Astanada Gulmıra Satybaldyǵa qatysty sot prosesi bastaldy. Gúlmıra Satybaldyǵa adam urlaýǵa qatysty jáne ozbyrlyq jasady degen aıyp taǵyldy.
Sotta Gúlmıra Satybaldymen birge taǵy eki adam otyr. Onyń júrgizýshisi adam urlaý qylmysyna qatysy bar degen boljam bar. Bul is boıynsha belgili kásipker Tursen Alagýzov jábirlenýshi bolyp otyr.
«Gúlmıra Satybaldyǵa Qylmystyq kodekstiń 389-babynyń 4-bóligi, 389-babynyń 3-bóligi, 28-bóligi, 3-bóligi, 125-babynyń 2-bóligi, 1 jáne 8-tarmaqtary boıynsha qylmystyq quqyq buzýshylyqtardy jasady dep aıyp taǵyldy. Mádı Batyrshaev qylmystyq quqyq buzýshylyq jasady dep aıyptaldy. Oǵan Qylmystyq kodekstiń 389-babynyń 3-bóligi, 28-bóligi, 3-bóligi, 125-babynyń 2-bóligi, 1, 8-tarmaqtary boıynsha aıyp taǵyldy. О́tebekov Rashıd QK-niń 125-babynyń 2-bóliginde kózdelgen qylmystyq quqyq buzýshylyqtardy jasady dep aıyptaldy», dedi sot otyrysynda memlekettik aıyptaýshy ókili.
Gúlmıra Satybaldynyń advokattary sottalýshyǵa qatysty barlyq qylmystyq isterdi biriktirýdi surady.
«Qazaqstanda Gúlmıra Satybaldyǵa qatysty úsh qylmystyq is qaralyp jatyr. Bir isti Qyzylordanyń №2 sotynda qarap jatyr, ekinshi isti Astana, úshinshi isti Almaty qalasy, Sybaılas jemqorlyqqa qarsy qyzmet departamenti qarap jatyr», dedi Satybaldynyń advokaty.
Sondaı-aq sottalýshynyń advokattary bultartpaý sharasyn úıqamaqqa ózgertýdi jáne qylmystyq isti qysqartýdy suraǵan.
Buǵan deıin bul qylmystyq is Almatynyń Almaly aýdandyq sotynda qarala bastaǵany habarlanǵan edi. Alaıda alǵashqy sot otyrysynda advokattar, boljam boıynsha, Gúlmıra Satybaldy prosesti Astanaǵa kóshirýdi suraǵan. Sýdıa olardyń ótinishin qanaǵattandyryp, isti Astana qalasy Baıqońyr aýdanynyń №2 aýdandyq sotyna jiberdi.
Eske salaıyq, Sybaılas jemqorlyqqa qarsy qyzmet ótken jyldyń naýryz aıynda sotqa deıingi tergeý bastalǵanyn habarlaǵan bolatyn. Is boıynsha aıyptalýshylar Qaırat Satybaldyuly, onyń burynǵy áıeli Gúlmıra jáne basqa da tulǵalar boldy. Olar bıznesti reıderlik jolmen basyp aldy degen kúdikke ilindi.
Keıin sot Gúlmıra Satybaldyny eki aıǵa qamaýǵa aldy. Bastapqyda ol 747 mıllıon teńgeni jymqyrdy degen kúdikke ilikti. Alaıda keıinirek olar Antıkorda birqatar kásiporynnyń aksııalary men múlkin zańsyz ıemdený, adam urlaý jáne zańsyz bas bostandyǵynan aıyrý faktileri boıynsha isti tergeı bastady.
Tergeýshilerdiń aıtýynsha, Gúlmıra Satybaldy sýsyn shyǵaratyn iri kompanııalardyń aksııalaryn tartyp almaq bolǵan. Kásipkerlikti reıderlik jolmen basyp alý týraly buǵan deıin eki kásipker málimdegen. Belgili kásipker Tursen Alagýzov ta bul is boıynsha jábirlenýshi. Keltirilgen shyǵyn kólemi 6,6 mlrd teńgeden astam boldy.
