Yntymaqtastyq jáne ózara túsinistik týraly memorandýmǵa L.N.Gýmılev atyndaǵy EUÝ rektory Erlan Sydyqov jáne «Astana Clinic» JShS dırektory Borıs Chen qol qoıdy. Taraptar birlese joǵary oqý ornynyń stýdentteri men oqytýshylaryna sapaly medısınalyq qyzmet kórsetý úshin qolaıly jaǵdaı jasaýdy josparlap otyr.
Kezdesý aıasynda bıznesmen Borıs Chen Eýrazııa ulttyq ýnıversıtetiniń belsendi stýdentterine 50 000 teńge kóleminde aı saıynǵy shákirtaqy taǵaıyndady. Sonymen birge kásipker áleýmettik jaýapkershilik tanytyp, ENU Endowment Fund qoryna 10 mln teńge kóleminde qarjy aýdardy. Rektor Erlan Sydyqov Borıs Chenge alǵys bildirip, oǵan mesenattardyń ýnıversıtet damýyna qosqan úlesine arnalǵan Dańq aǵashynyń japyraǵyn tabys etti.
«Eýrazııa ulttyq ýnıversıtetinde stýdentterdiń arasynda sabaqtastyq saqtalyp, jaqsy dástúrler kóbeıip keledi. Bizdiń kásipkerler men túlekter oqý ordasynyń ómirine belsendi qatysady jáne adamı áleýetti damytýǵa ǵana emes, búkil eldiń bolashaǵyna óz úlesin qosyp jatyr. Eýrazııa ulttyq ýnıversıtetiniń negizgi mindeti – stýdentke baǵyttalǵan bilim. Sondyqtan biz stýdentterdiń áleýmettik qamsyzdandyrylýyna, onyń ishinde densaýlyǵyna erekshe mán beremiz. Jańa stýdenttik úıdiń qurylysyn bastaý josparlanyp otyr. Onyń birinshi qabatynda emhana ornalasady. Seriktesterimizge ýnıversıtet ómirine qatysqany jáne onyń órkendeýine qosqan úlesi úshin alǵysymdy bildiremin», dedi Erlan Sydyqov.
«Astana Clinic» JShS dırektory Borıs Chen bıznestiń áleýmettik jaýapkershiliginiń mańyzdylyǵyn atap ótti.
«Jasyratyny joq, Eýrazııa ulttyq ýnıversıteti – elimizdegi jetekshi oqý ordalarynyń biri. Ulttyń jetistigi eki negizgi faktorǵa – densaýlyq pen bilimge baılanysty. Biz ýnıversıtet stýdentteri men qyzmetkerlerine 6 jyl boıy qyzmet kórsetemiz. Búgin bilim berý salasyna óz úlesimizdi qosýdy jón kórdik – stýdentterge bizdiń emhananyń shákirtaqysyn berý arqyly qoldaý kórsetip, ýnıversıtettiń endaýment qoryna úles qostyq. Biz ýnıversıtettiń bilim alýshylary men qyzmetkerlerine qyzmet kórsetetin eýropalyq standarttar boıynsha klınıka salamyz», dedi kásipker.
Ýnıversıtettiń strategııalyq damý jónindegi prorektory Dýman Aıtmaǵambetov joǵary bilim berý salasyndaǵy áleýmettik jaýapty ınvestısııalardyń jáne endaýment qorlardyń mańyzdylyǵyna toqtaldy.
«Endaýment qordyń maqsatty kapıtalyna qol suǵylmaıdy jáne onyń jınaqtaý sıpaty bar. Odan túsken ınvestısııalyq tabys esebinen ǵana jobalardy qarjylandyrýdy júzege asyrý josparlanyp otyr. ENU Endowment Fund quryltaıshylary EUÝ túlekteri muqtaj stýdentterge granttar men shákirtaqylar taǵaıyndaý arqyly qoldaý kórsetýdi, bilim alýshylardyń ǵylymı-ınnovasııalyq jáne kásipkerlik qyzmetine járdemdesýdi jáne talantty jastarǵa qolǵabys etýdi josparlap otyr. ENU Endowment Fund qazir qalyptasý kezeńinde jáne túlektermen men kásipkerlerdi áriptestikke shaqyramyn», dedi prorektor.
Ýnıversıtettiń 2 kýrs stýdenti Nazerke Ulan bilim ordasynyń qoǵamdyq ómirine belsendi qatysady. Ol «ENU volunteers» qatarynda muqtaj adamdarǵa kómektesip, qoǵamnyń damýyna óz úlesin qosyp keledi.
«Aı saıyn shákirtaqy alyp turý men úshin kútpegen jaǵdaı boldy. Bul – eń baqytty sátterimniń biri. Mundaı múmkindik bárine birdeı berilmeıdi. Men óz ýnıversıtetime jáne «Astana Clinic» kompanııasyna stýdentterge qomaqty qoldaý kórsetkeni úshin alǵysymdy bildiremin. Birinshi kýrstan bastap volonterlikpen belsendi túrde aınalysyp kelemin. Biz balalar úılerine, mereke kúnderi qarttar úılerine baramyz, olarǵa jaqsy kóńil kúı syılaýǵa tyrysamyz. Elimizde volonterler qozǵalysynyń damýyna úles qosqym keledi», deıdi Nazerke.
Aıta ketý kerek, ótken jyldyń sáýir aıynda ýnıversıtet túlekteriniń bastamasymen ENU Endowment Fund qory qurylǵan bolatyn. Qorǵa 10 mln teńge kóleminde alǵashqy jarnany ENU Endowment Fund quryltaıshylarynyń biri, oqý ordasynyń túlegi Dmıtrıı Inıýtın aýdardy.
