Júzden júırik qyrkúıekte anyqtalady

Ortalyq kommýnıkasııalar qyzmetiniń keshegi brıfıngi Prezıdent janyndaǵy Áıelder isteri jáne otbasylyq-demo­grafııalyq saıasat jónindegi ulttyq komıssııa uıymdastyrǵan «Mereıli otbasy» baıqaýynyń alǵashqy kezeńderiniń qory­tyndysyna arnaldy. Ana men balany qorǵaý, otbasy ınstıtýtyn nyǵaıtý, sondaı-aq, otbasylyq qundylyqtardy, tarıhı dástúr men mádenıetti saqtap, jastardy adamgershilikke baýlý týraly Elbasy tapsyrmasyna oraı Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń júıeli jumystar atqaryp kele jatqany anyq. Sol ıgilikti isterdiń biri – byltyr  qyrkúıek aıynyń ekinshi jeksenbisinde tuńǵysh ret otbasy kúni toılanǵany da kópshiliktiń jadynda. Eleýli merekeniń qarsańynda alǵash ret «Mereıli otbasy» atty úlken baıqaýdyń tusaýy kesilip, onyń jeńimpazdary kezeń-kezeń boıynsha anyqtalýy tıis bolǵan. Birinshi kezeń aýdandar men qala deńgeıinde ótken bolsa, ekinshi kezeń qatysýshylary  oblystar men Almaty jáne Astana qalalary deńgeıinde júldeli oryndarǵa ıe boldy. Mundaǵy negizgi maqsat – qazaqstandyq otbasynyń oń ımıdjin dáripteý, jastarǵa baqytty jubaılyq ómirdi nasıhattaý desek qatelese qoımaspyz. Kezeń-kezeńmen ótkizilgen úlken baıqaýdyń alda sheshýshi kezeńi tur. Respýblıkalyq deńgeıde ótip, júzden júırikti anyqtaıtyn báıgege oblystar men Astana jáne Almaty qalalarynda jeńimpaz bolǵan 16 otbasy joldama alǵan. Osy baıqaýdyń jaı-japsary týraly áńgimelegen Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Mahabbat Sansyzbaeva baıqaýǵa qatysýǵa nıet bildirgen árbir otbasynyń ózindik erekshelikteri men artyqshylyqtary bolǵanyn, olardy anyqtaý aımaqta jumys istegen komıssııa múshelerine ońaıǵa soqpaǵanyn aıta kele, 500-ge jýyq otbasynyń ishinen iriktelgen 16 otbasy aldaǵy 12 qyrkúıekte ótetin baıqaýda baq synaıtynyn jetkizdi.  «23 mamyr kúni respýblıkalyq kezeńge ótken jeńimpazdar anyqtaldy. Atap aıtar bolsaq, Astana qalasy boıynsha jeńimpaz dep tanylǵan Ahmetovter otbasy temirjolshylar áýleti bop esepteledi. Olarda 67 adam temirjolda eńbek etedi. Almaty qalasynda álemdegi 14-ke jýyq shyńdy baǵyndyrǵan alpınıster otbasy Jumaevtar jeńis tuǵyrynan kórindi.  Aqmola oblysy boıynsha jeńimpaz atanǵan Muqashevtar otbasynyń pedagogıkalyq ótili 300 jyldan asady eken. Almaty oblysy boıynsha jeńimpaz dep tanylǵan Eshojınder otbasy 340 balany asyrap alyp, Elbasynyń qolynan syılyq alǵan.  Atyraý oblysynyń jeńimpaz otbasy – Beshimovterdiń 3 býyn urpaǵy munaı salasynda eńbek etedi» – dedi Mahabbat Bekbosynova. Ol sondaı-aq, árbir oblys boıynsha jeńimpaz dep tanylǵan otbasylardyń barlyǵyn atap shyǵyp, olarǵa tán erekshelikterdi baıandap berdi. Brıfıngke Ulttyq komıs­sııa­nyń tóraıymynan ózge «Respýb­lıkalyq balalardy ońaltý orta­lyǵy» AQ Dırektorlar keńesiniń tóraǵasy Beksultan Tutqyshev, «Qazaqstannyń isker áıelderi qaýymdastyǵy» RQB prezıdenti Raýshan Sársembaeva, sondaı-aq, «Damý» Kásipkerlikti qoldaý qory» AQ Basqarma tóraıymy Lázzat Ibragımova qatysyp, ulttyq komıssııanyń uıytqy bolýymen júzege asqan basqa da is-sharalar týraly baıandap berdi. Aıgúl SEIILOVA, «Egemen Qazaqstan».