Kásipker Qaırat Boranbaevtyń isi boıynsha taraptardyń jaryssózi búgin, 14 naýryzda Astana qalasynyń №2 Saryarqa sotynda ótýi tıis edi. Alaıda, memlekettik aıyptaýshy-prokýror Baýyrjan Shekenov ózine qosymsha ýaqyt berý týraly sotqa ótinish bildirip, is boıynsha jaǵdaı birshama ózgergenin málimdedi.
«QR QIJK-niń 340-baby, 5-bólimine sáıkes, eger basty sot talqylaýy barysynda sottalýshyǵa neǵurlym aýyr aıyp taǵý nemese bastapqy aıyptan basqa aıyp taǵý qajettiligi týyndasa, sot isti qaraýdy keıinge qaldyrady jáne prokýrorǵa jańa aıyptaý aktisin jasaý úshin qajetti ýaqyt beredi. Osyǵan baılanysty aıyptaýshy tarap jańa aıyptaý aktisin toltyrý úshin ýaqyt berýdi surap, ótinish bildiredi, óıtkeni qylmystyq is boıynsha mán-jaılar ózgeredi jáne bul jańa aktide kórsetýdi talap etedi», dep túsindirdi prokýror Baýyrjan Shekenov.
№2 Saryarqa sotynyń sýdıasy Nazgúl Bapaqova aıyptaýshy taraptyń ótinishin qanaǵattandyrdy. Osylaısha, sot otyrysy 17 naýryzǵa belgilendi.
Eske sala ketsek, Qaırat Boranbaev pen «Azııa Gazchýndja» JShS-niń negizin qalaýshy Roman Nahanovqa ózderine senip tapsyrylǵan bóten múlikti jymqyrdy, zańsyz aqshany jáne múlikti zańdastyrdy, basqa da qylmystarǵa járdem kórsetti degen aıyp taǵylyp otyr.
Atalǵan is boıynsha sot prosesi 2022 jyldyń 30 jeltoqsanynda bastalǵanyn atap ótý kerek.
