Kórmeniń maqsaty – kelýshilerdi ıspan mádenıetimen tanystyryp, sondaı-aq Hose Marııa Kanonyń kórkemdik sheberligin kórsetip jáne bolashaq sýretshilerdiń enkaýstıka tehnıkasyna degen qyzyǵýshylyǵyn oıatý.
Is-sharanyń ashylýynda Qazaqstandaǵy Ispanııa koroldiginiń Tótenshe jáne ókiletti elshisi Horhe Ýrbıola Lopes de Montenegro atalǵan kórmeniń eki eldiń mádenı dostyǵyn odan ári jaqyndata túsetinin jetkizdi.
– О́ner – halyqtardy jaqyndastyryp, biriktire túsedi. Hose Marııa Kano – taza ónerdiń ıesi. Onyń shyǵarmashylyǵynda aı taqyryby erekshe oryn alǵan. Sýretshi qazaq halqynyń tazalyǵy men shynaıylyǵyn joǵary baǵalaıdy. Bir jaǵynan, bul qasıet – eki halyqtyń dostyǵyn nyǵaıtady. Búgingi shara – sýretshiniń ekinshi ret ótip otyrǵan kórmesi jáne sońǵysy bolmaıdy dep úmittenemiz, – dedi elshi.
Hose Marııa Kano – ıspan elindegi aıtýly sýretshilerdiń biri. Onyń shyǵarmashylyǵynyń ózgeshe qyrlary týraly Hıýgo Rıfkınd óz maqalasynda: «Kano eńbekteri tereńdigimen, tazalyǵymen daralanyp turady. Sondyqtan ol kartınalarǵa qaraǵanda músinge kóbirek uqsaıdy», dep jazypty.
Kórmede kópshilikti sýretshiniń erekshe jumys isteý tehnıkasy tańǵaldyrdy. Materıalǵa kúıdirilgen balaýyz boıaýlarymen keskindeý ádisi ejelgi Mysyrda keńirek qoldanylǵan. Mysyrlyq qolónershilerdiń balaýyzdy qoldanýy mýmııalardy boıaǵanda qansha ýaqyt ótse de ózgermeıtindiginen týyndapty. Osy maqsatta balaýyz boıaýǵa qosylǵan shaıyr sekildi ról atqarǵan. Jazbasha derekterde enkaýstıka tehnıkasy týraly málimettiń azdyǵyna qaramastan, búginge deıin oǵan qyzyǵýshylyq azaıǵan emes.
Aıta keteıik, atalǵan kórme 27 naýryzǵa deıin jalǵasady.
