Sezd qorytyndylaryn baıandady

Ortalyq kommýnıkasııalar qyz­metinde ótken kezekti brıfıng­ke Ulttyq kásipkerler palata­sy­nyń basqarma tóraǵasy Abylaı Myr­zahmetov kelip, elordada ót­ken pala­tanyń I Seziniń qory­tyn­dylary jaıynda aıtyp berdi. «Sezd quryltaılyq kezeńniń qorytyndysyn shyǵardy dep aıtýǵa bolady. Barlyq organdar qurylyp, bilikti shtab jasaqtaldy. Sezd de­legattary bizdiń aldaǵy úsh jyl­ǵa arnalǵan strategııamyzdy bekit­ti», – dedi Ulttyq kásipkerler palata­sy­nyń basqarma tóraǵasy A.Myr­zahmetov. Jalpy 232 delegat saılansa, onyń 50 paıyzy óńirler men Astana, Almaty qalalarynyń ókilderi. Qalǵan jartysyn akkredıttelgen salalar men salaaralyq respýblıkalyq qaýymdastyqtar usynypty. UKP qurylǵan sátten bastap Palata 10 myńnan astam ótinishter men hattardy qarastyryp shyqqan. Onyń ishinde 1770-ten astamy normatıvtik quqyqtyq aktiler jobalaryna saraptama ótkizýge suranymynan turǵan. Memlekettik organdarǵa UKP-dan 1671 saraptamalyq qorytyndy jol­danǵan. Ulttyq palata bızneske prak­tı­kalyq kómek te kórsetýde. Orta­lyq apparatynda da, óńirlerde de Ká­sipkerler quqyǵyn qorǵaý jónin­degi keńester qurylǵan. Kún saıyn konsýltasııa surap qońyraý sha­lýǵa bolatyn call-center áreket etedi. Palata qurylǵan kezden beri bız­nesti qorǵaý jelisi boıynsha eki myńnan astam ótinish tirkelgen. Ká­sipkerler máselesin sheshýdiń biryń­ǵaı tizilimi men olardy sheshý kar­­talary iske qosylǵan. Oǵan bız­nes­tiń 416 júıelik problemasy engizilgen. Elbasy tapsyrmalary boıynsha Bıznesti qoldaýdyń birinshi kezektegi sharalarynyń jospary júzege asyrylýda. Jyl sońyna deıin Mem­leket basshysynyń tapsyrmasy boı­­yn­sha kásipkerlikti damytý jáne qol­daýdyń biryńǵaı baǵdarlamasy ázirlenbek. Sezd 2017 jylǵa deıingi Ult­tyq kásipkerler palatasynyń Qa­lyp­tasý jáne damý strategııasyna usynylǵan ustanymdardy ma­quldady. Palatanyń negizgi uzaq merzimdi maqsaty bolyp 2030 jylǵa qaraı ekonomıkadaǵy ShOB úlesin kem degende 40 paıyz deńgeıinde ósirýge járdemdesý anyqtaldy. 2017 jylǵa qaraı UKP kásipkerlik bastamasynyń ósýin qamtamasyz etýdi jáne otandyq ekonomıkany damytýǵa bıznestiń kúshi men ınves­tısııasyn baǵyttaýdy josparlap otyr. UKP Strategııasy palata saıtynda ornalastyrylǵan. Sezd qorytyndylary boıynsha Premer-Mınıstr Kárim Másimov birqatar mınıstrlikterge UKP-men birlesip aýyldyq kásipkerler úshin kredıtterdiń qoljetimdiligi máselelerin sheshý, memlekettik organdardyń UKP-men ózara árekettestiginiń úlgilik rettemesin daıyndaý, UKP-de akkredıtteýden ótken qaýymdastyqtardy salalyq zertteýler júrgizý jáne standarttar, rettemeler jasaý úderisine tartý múmkindigi boıynsha usynystar engizý men daıarlaý jóninde tapsyrma beripti. Sonymen qatar, Úkimet basshysy Ulttyq palata resýrstaryn óńirlerdegi iskerlik ahýaldardy baǵamdaýǵa jáne Qazaqstandaǵy kásipkerlik belsendiliktiń jaı-kúıi týraly jyl saıynǵy ulttyq baıandama daıarlaýǵa turaqty negizde tartýdy usynypty. Aıta keteıik, sezdiń biraýyzdan qabyldanǵan sheshimimen palatanyń tóralqa tóraǵasy bolyp Tımýr Qulybaev, UKP Basqarma tóraǵasy bolyp Abylaı Myrzahmetov qaıta saılanǵan bolatyn. Ábdirahman QYDYRBEK, «Egemen Qazaqstan».