Mýzeı qyzmetkeriniń aıtýynsha, bul oryndyq murajaı ashylǵan jyldary ákelingen. Naqty kim tapsyrǵany belgisiz. Keıin qaıta jańǵyrtýdan ótken. Qazir mýzeıdegi baǵaly jádigerdiń biri.
Sákenniń aqyndyǵy men qaıratkerliginen bólek, sándi kıinip, sulý-sypa júrgenin jaqsy bilemiz. Buǵan dálel retinde ataqty jazýshy Sábıt Muqanovtyń Sáken Seıfýllın týraly esteliginen bir úzindi keltire keteıik: «Meni eki nárse qaıran qaldyrdy: biri – bul adamnyń kóńili, ekinshisi – keskin-keıpi. Áýeli kıimi týraly: basynda dóńgelek qundyz bórik, ústinde qundyz jaǵaly palto, aıaǵynda saptama qazaqy etik. Bular meniń ol kezdegi uǵymymda, tek býrjýılarǵa ǵana tán kıim! Boıy ortadan bıikteý, denesi tik, jaýyryny keń bul adamnyń keskin jobasy qazaq: biraq ádettegi qazaqtyń biri emes, asa sulý qazaq; mańdaıy keń, murny sulýlana bitken dóńes, ımek qasy, qalyń uzyn kirpikterinde qyraý turǵan sulý qara kózderi úlken, qaıyrǵan qoıý uzyn murtyna appaq bop qalyń qyraý turǵan, ózi dál solaı ma, álde aıaz súıýden be – sulý betinde qulpyra qan oınaıdy!»
