«Kúmis ýnıversıtet» jobasy zeınet jasyndaǵy jáne egde tartqan adamdardyń ómir súrý sapasyn jaqsartý maqsatynda uıymdastyrylǵan. Bul – ýnıversıtettiń úshinshi mıssııasyn iske asyrýy ǵana emes, ómir boıy bilim alý konsepsııasyn júzege asyrýdyń jarqyn úlgisi.
Is-shara barysynda «Zeınet jasyndaǵy adamdarǵa arnalǵan sıfrlyq saýattylyq», «Saıahatqa arnalǵan aǵylshyn tili», «Psıhoterapııa – ART-terapııa» kýrstary jáne «Skandınav júrisi» úıirmesi boıynsha oqýyn sátti tamamdaǵan 46 qatysýshyǵa sertıfıkat tabystaldy.
Sertıfıkat tabystaý rásimine oqý ornynyń áleýmettik seriktesteri – qalalyq Dostyq úıiniń, «Semeı qalasynyń arnaýly áleýmettik qyzmetter kórsetý jáne belsendi uzaq ómir súrý ortalyǵy» KMM, oblystyq Ardagerler keńesiniń ókilderi, sonymen qatar ýnıversıtet ardagerleri, ÚEU jáne BAQ ókilderi qatysty.
«Kúmis ýnıversıtet» jobasyn Bókeıhan ýnıversıtetiniń biliktilikti arttyrý jáne qosymsha bilim berý ınstıtýty beıresmı bilim berý baǵdarlamalaryn iske asyrý aıasynda júrgizip keledi.
Oqytý Álıhan Bókeıhan ýnıversıtetiniń kampýsynda, yńǵaıly da jaıly jaǵdaılarda júrgiziledi. Qatysýshylar jańa bilim men jańa daǵdylardy ıgerip qana qoımaı, ózara qarym-qatynas jasap, bos ýaqyttaryn tıimdi ári paıdaly ótkizedi. Sonymen qatar jobaǵa qatysýshylar ýnıversıtet kitaphanasy, kompıýterlik klasstar, sport jáne trenajer zaldaryn erkin paıdalana alady.
