Mazmundy is-sharaǵa densaýlyq saqtaý salasynda jasandy ıntellekt, robottehnıka, mashınalyq oılaý jáne úlken derekterdi engizý jobalarymen tabysty jumys istep júrgen zııatkerlik mektepterdiń jas ǵalymdary qatysty. Osymen on ekinshi ret ótken kezdesý mektep oqýshylarynyń ǵylymı-zertteý jumystary 3D-bıoprıntıngke, aqyldy protezder men bıoınterfeısterdi jasaýǵa jáne zamanaýı medısınanyń basqa da ózekti basymdyqtaryna arnaldy.
Naýryz kezdesýiniń ashylýynda Oqý-aǵartý mınıstri Ǵanı Beısembaev aldymen qatysýshylardy ótip ketken Amal merekesimen quttyqtap, jas ǵalymdarǵa jyly lebizin jetkizdi.
– 2011 jyly alǵashqy tusaýyn kesken is-sharanyń tarıhı da, ǵylymı da mańyzy úlken. Sebebi talapty jastardyń alǵan ǵylymı zertteýleriniń taqyryptary óte qyzyqty. Maǵan unaǵany – olardyń jasaǵan jobalary shynaıylyǵymen ǵana emes, kádimgi ómirde qajettiligi bar ekenin aıqyndap tur. Barlyq ǵylymnyń negizi mektepte qalanady. Osyǵan qarap búgingi sharanyń taqyrybyna aınalǵan bıologııa ǵylymynyń negizin qalap jatqandaryńyzdy kórip otyrmyn. Bul baǵyttaǵy irgeli jobalardy odan ári jalǵastyra berý kerek. Armandaı bilgen, qııaldaı bilgen balanyń bolashaǵy zor. Álemde ataǵynan at úrketin ǵalymdardyń bári kókten túsken joq. Sizder sekildi mektepte oqyp, óz armandaryna qol jetkizip, ǵylymda ǵajaıyp jańalyqtar ashty. Men de sizderden sondaı úmit kútemin, – dedi mınıstr.
Sodan keıin sóz alǵan Nazarbaev zııatkerlik mektepteri basqarma tóraǵasy Ánýar Janǵozın bıylǵy is-sharanyń mańyzyna toqtaldy.
– Buǵan elimizden 150-den asa oqýshy qatyssa, olardyń 50-i aýyl mektebinen keldi. Bul Bilim berý turaqty damytý qorymen birlesken joba aıasynda iske asty. Aýyldaǵy tirek mektepterden kelgen oqýshylarda ǵylymı jumystaryn qorǵaıdy. Jalpy, qorǵaýǵa elýden asa ǵylymı joba usynylyp otyr. Ár jobaǵa 3-4 baladan qatysady. Qazylar alqasynyń sheshimimen joǵary nátıje kórsetken oqýshylarǵa qomaqty syılyǵymyz bar. Máselen, qatarlastarynan úzdik shyqqan alty óren elimizdegi aldyńǵy qatarly ýnıversıtetterdiń grantyna ıe bolady, – dedi ol.
Odan soń kezdesý plenarlyq otyrysqa jalǵasyp, onda Nazarbaev ýnıversıteti Medısına mektebiniń dekany Massımo Pıntellı, «Ana men bala» ulttyq ǵylymı ortalyǵynyń balalar hırýrgııa bóliminiń jetekshisi Dastan Rústemov jáne Nazarbaev ýnıversıtetiniń professory Atakan Varol, Nazarbaev ýntversıteti Medısına mektebiniń professory Ábdijappar Gaıpov sekildi ǵalymdar baıandama jasap, ǵylym jolyndaǵy óz tájirıbelerimen bólisti.
Sonymen birge «Bıomedısına, ınjenerııa jáne tehnologııalar» taqyrybynda Nazarbaev zııatkerlik mektepteri men aýyldaǵy tirek mektepteri oqýshylarynyń ǵylymı jobalar kórmesi ótti.
Úsh kúnge jobalanǵan kezdesý aıasynda qatysýshylar elordadaǵy fızıka-matematıka baǵytyndaǵy zııatkerlik mekteptiń «NIS Engineering» tehnotorııasynda robottehnıka jáne dızaındyq oılaý boıynsha sheberlik synyby men «Qurmanǵazynyń áıgili bes kúıi» men «100 án» atty shyǵarmashylyq saǵatyna qatysady. Sondaı-aq «Naýryz tartýy» atty konserttik baǵdarlamany tamashalap, elordadaǵy Ulttyq mýzeı men «Astana Opera» teatryna ekskýrsııa jasaıdy.
