Elimizden iri qara mal men usaq mal áketýge kvota engiziledi

Atap aıtqanda, alty aı merzimge iri qara mal men tiri qoılarǵa sandyq shekteýler (kvotalar) engiziledi:

• 60 000 (alpys myń) bas tiri iri qara maldy Qazaqstan Respýblıkasynyń aýmaǵynan úshinshi elderge jáne Eýrazııalyq ekonomıkalyq odaq elderine áketýge;
• 120 000 (júz jıyrma myń) bas tiri qoılar men eshkiler Qazaqstan Respýblıkasynyń aýmaǵynan úshinshi elderge jáne Eýrazııalyq ekonomıkalyq odaq elderine áketýge.

Qujatta belgilengen sandyq shekteýden asyp ketken jaǵdaıda, AShJB avtomatty túrde janýarlardy karantınge qoıýdy, BABJ AJ veterınarııalyq sertıfıkattardy berýdi buǵattaıtyny aıtylǵan.

Sondaı-aq buqashyqtardy karantınge qoıýǵa shekteý engizildi:

• bordaqylaý alańdary úshin – 30 000 (otyz myń) bas;
• taýar óndirýshiler úshin – 30 000 (otyz myń ) bas.

Erkek toqtylardy karantınge qoıý úshin sandyq lımıt:

• bordaqylaý alańdary úshin – 30 000 (otyz myń ) bas;
• taýar óndirýshiler úshin – 90 000 (toqsan myń) bas.

Qazaqstan Respýblıkasynyń aýmaǵynan buqashyqtardy áketýge kvota alý úshin bir bordaqylaý alańyna arnalǵan lımıt jıyntyq mólsherde 500 (bes júz) bastan aspaıdy, bir taýar óndirýshi úshin – 200 (eki júz) bastan aspaıdy.

Qujat 4 sáýirge deıin talqylaý úshin Ashyq NQA saıtynda jarııalandy.

2022 jyly Qazaqstanda iri qara maldy, qoı-eshkini eksporttaýǵa tyıym salynsa, bıylǵy jyldyń basynan bastap bul janýarlardy eksporttaýǵa kvotalar engizildi.