Sport • 17 Naýryz, 2023

Konkımen júgirýden astanalyq jastar úzdik nátıje kórsetti

Búgin Astana qalasyndaǵy «Alaý» muz aıdynynda konkımen júgirýden IV qysqy Jastar sport oıyndary máresine jetti. Sheshýshi jarys kúni 1500 metr men mass-starttan úzdikter anyqtaldy, dep habarlaıdy Egemen.kz elorda ákimdiginiń resmı saıtyna silteme jasap.

Marjan TILEÝBEK

Áıelder arasynda 1500 metrde elordalyq Alına Daýranova qarsylas shaq keltirmedi. Darıa Gavrılova (Astana) kúmis, Alıona Lıfatova (Pavlodar oblysy) qola medalge qol jetkizdi. Erler arasynda Vadım Iаkýbovskıı (Qostanaı oblysy) chempıon atansa, Roman Bınazarov (Qostanaı oblysy) pen Mıhaıl Glýshenko (Almaty) odan keıingi tuǵyr satysyna kóterildi.

Ulttyq qurama sportshysy Alına Daýranova mass-startta da márege birinshi kelip, osy oıyndardaǵy 6-altynyn moınyna taqty. Qalǵan júldeni Soltústik Qazaqstan oblysynyń ókilderi Krıstına jáne Alına Shýmekovalar ıelendi.

Osy maýsymdaǵy sońǵy jarysta sátti óner kórsetken jerlesimiz Alına Daýranova jarystan keıin óz áserimen bólisti.

«Bul maýsymdaǵy jarystyń bárinde barynsha jaqsy nátıje kórsetýge tyrystym. Alǵash ret eresekter arasynda synǵa tústim. Munda bizben birge jasóspirimder de jarysty. Olar úshin tájirıbe jınaıtyn taptyrmas alań boldy. Oıyndardaǵy kórsetkishterime kóńilim tolady. Úsh kúnde 6 altyn medal aldym. Endi az-kem demalystan soń kelesi maýsymǵa daıyndyqty bastaımyz», dedi ol.

Erler arasyndaǵy tartysty synda almatylyq Abdýmálik Asqardyń mereıi ústem tústi. Ol komandalasy Mıhaıl Glýshenko men elordalyq Rýslan Janádilovten bir taban alda boldy.

Konkımen júgirýden IV qysqy Jastar sport oıyndarynda jalpy esepte Astana qalasy jeńiske jetse, Qostanaı oblysy 2-orynǵa, al Almaty qalasynyń komandasy 3-satyǵa turaqtady.

Aıta keteıik, keshendi jarysqa 8 oblys pen 2 qaladan barlyǵy 120 tańdaýly konkıshi qatysty.