Oblystyq polısııa departamenti taratqan derekke júginsek, óńirde kóshi-qon salasyndaǵy jumys tyńǵylyqty zerdelenip jatyr. Quzyrly organ qyzmetkerleri bir turǵyn úıge ondaǵan, tipti júzdegen adam resmı túrde tirkelgen meken jaılardy teksergen.
Is-shara barysynda Qazaqstan Respýblıkasynyń 653 azamaty jáne TMD elderiniń 26 azamaty ákimshilik jaýapkershilikke tartyldy. Polıseıler jalǵan tirkeý belgileri bar 839 meken jaıdy anyqtady. Atalǵan páterler men turǵyn úılerde jalpy sany 16 306 adam tirkeýde turǵan. Olardyń bir bóligi bul meken jaılarda eshqashan turmaǵan.
Azamattardy naqty turǵylyqty jerinsiz tirkegeni úshin 82 adam jaýapkershilikke tartyldy. Sonymen qatar, on kúnnen bir aıǵa deıin tirkeýsiz nemese jeke basyn kýálandyratyn qujatsyz turǵan 414 derek anyqtaldy. Budan bólek, 143 adam jeke basyn kýálandyratyn qujatsyz, jaramsyz qujatpen nemese ýaqytsha turý orny boıynsha bir aıdan astam tirkeýsiz ómir súrgen.
Turǵyn úı ıeleriniń de jaýapkershiligi nazardan tys qalǵan joq. Úıinde is júzinde turmaıtyn adamdardy tirkeýge jol bergeni úshin 47 adam jaýapkershilikke tartyldy. Taǵy 35 jaǵdaıda páter ıeleri burynnan turmaıtyn adamdardy tirkeýden shyǵarý boıynsha shara qabyldamaǵan.
