Atap aıtqanda, №103, 104, 105, 106, 107 men «Aqtaý-Qyzyltóbe-2-Aqtaý» jáne «Aqtaý-Batyr-Aqtaý», «Aqtaý-Aqshuqyr-Aqtaý», sondaı-aq «Aqtaý-Saıyn Shapaǵatov-Aqtaý» baǵyttarynda jolaýshylar tegin qatynaýda.
«Búgin qoǵamdyq kólikter jolaýshylarǵa tegin qyzmet kórsetip jatyr. Olar ózderiniń daýys berý ýchaskelerine tegin jete alady», deıdi Mańǵystaý oblysynyń jolaýshylar kóligi jáne avtomobıl joldary basqarmasynyń basshysy Adaıbek Qalıev.
Onyń aıtýynsha, 22 naýryzda dál osy baǵyttaǵy qoǵamdyq kólikterde jol júrý turǵyndar úshin tegin bolmaq.
Igi iske shahar turǵyndary rızashylyǵyn bildirdi. Aqtaý qalasy turǵyny Aıgúl Maqsymovanyń aıtýynsha, bul saılaý kúninde turǵyndar úshin jasalǵan óte durys sheshim.
«Tańerteń turyp, saılaý ýchaskesine qoǵamdyq kólikpen tegin bardym. Demalys kúni bolǵan soń, týysymnyń úıine qonaqqa barý úshin №105 avtobýsyna mindim. Qoǵamdyq kólik júrgizýshisi búgingi saılaý kúnine oraı jolaqy almaıtynyn aıtty. Qýanyp qaldym», deıdi Aıgúl Maqsymova.
