Bul servıs Sıfrlyq damý, ınnovasııalar jáne aeroǵarysh ónerkásibi mınıstrligi, Ulttyq bank, «Ulttyq aqparattyq tehnologııalar» AQ jáne «Memlekettik nesıe bıýrosy» AQ úılesimdi jumysynyń nátıjesinde júzege asyryldy.
Saqtandyrý polısi – kólik quraldary ıeleriniń azamattyq-quqyqtyq jaýapkershiligin saqtandyrýdyń mindetti túri boıynsha saqtandyrýshy men saqtanýshy arasyndaǵy sharttyq qatynastardyń deregin rastaıtyn qujat.
– Basqa sıfrlyq qujattarmen uqsastyǵy boıynsha «saqtandyrý polısi» qaǵaz qujatpen qatar zańdy kúshine ıe jáne saqtandyrý kompanııasy, saqtandyrý polısiniń merzimi jáne taǵy da basqa aqparatty qamtıdy. Atalǵan sıfrlyq qujattaǵy barlyq málimet «Memlekettik nesıe bıýrosy» AQ aqparattyq júıesimen ıntegrasııalyq ózara is-qımyl arqyly kórsetiledi. Mınıstrlik halyqqa yńǵaıly bolý úshin qujattardy sıfrlandyrý jumysyn jalǵastyrady, – dedi mınıstr Baǵdat Mýsın.
Atalǵan sıfrlyq qujat azamattarǵa óz qujatyn mobıldi qosymsha arqyly elektrondyq formatta kórýge, sondaı-aq onyń durystyǵyn tekserýge múmkindik beredi.
Saqtandyrý polısiniń bolýy nemese bolmaýy týraly aqparat mindetti saqtandyrý týraly zańnyń talaptaryn, atap aıtqanda, kólik quraldary ıeleriniń azamattyq-quqyqtyq jaýapkershiligin oryndaý úshin, sondaı-aq azamatty saqtandyrý shartynyń aıaqtalý merzimin baqylaý jáne ózge de maqsattar úshin paıdalanýǵa qajet.
Memlekettik nesıe bıýrosynyń málimetinshe, 2022 jyldyń qorytyndysy boıynsha 6 mln-nan astam saqtandyrý polısi berilgen.
