Sonymen saılaý da ótti. Tańdaý jasaǵan kún tarıhqa aınalady. Al «Kimdi tańdadyq? Ne úshin tańdadyq?» degen suraq únemi til ushynda tura beredi. Sondaı-aq bul saılaý sonshalyqty mańyzdy ma degen de oı keledi. Aqıqatynda, bul saılaýda otandastarymyz Ádiletti Qazaqstannyń baqýatty turmysy úshin aıanbaı eńbek etetin úmitkerlerdi tańdap aldy. Tańdaý men talǵam týraly talaspaıdy, degenmen kózi ashyq kópshilik kandıdattarǵa daýys bere otyryp, eldiń aldaǵy 5 jyldaǵy zań men ádildik jolyndaǵy damýyna degen jaýapkershilikti de arqalaıtyny anyq.
Osy jerde Ádiletti Qazaqstan qurý jolyndaǵy jumys áriden bastalǵanyn da aıtýymyz kerek. Onyń egjeı-tegjeıin Memleket basshysy Qasym-Jomart Toqaev buǵan deıin jarııalaǵan Joldaýynda anyq aıtty. Árıne, ýaqyttyń qysqalyǵyna qaramastan, qyrýar jumys isteldi.
Elde referendým ótip, qabyldaǵan reformalardy iske asyrý qarqyn aldy. Konstıtýsııalyq reforma qabyldandy. Prezıdent saılaýy ótti. Ulttyq quryltaı quryldy jáne basqa degendeı... Osylaı bastalǵan uly murat jolyndaǵy jumys ótken saılaýdyń maqsaty men mindetin aıqyndap bergen edi. Memleket basshysy byltyrǵy Joldaýynda aralas saılaý júıesin engizýdi bastama etip kóterip, proporsıonaldy jáne majorıtarlyq saılaý júıesin birge qoldanýdy usyndy. Bul saılaýdyń burynǵy saılaýlardan ózgesheligi de osynda. Iаǵnı ótken saılaýdy Qazaqstan tarıhynyń jańa kezeńi dep aıtýǵa tolyq quqylymyz. Bul – eldegi saıası reformalardyń márege jetkenin aıǵaqtaıdy. Jaqynda ol týraly Memleket basshysy da aıtqan bolatyn.
«Bizdiń bolashaǵymyz – aıqyn, naqty josparymyz bar. Májilis jáne máslıhattar saılaýy – bılik ınstıtýttaryn jańartý jumysynyń qorytyndy kezeńi. Osylaısha, bılik jan-jaqty reformalardy jalǵastyrý úshin jańa senim mandatyna ıe bolady. Elimizdi damytý jolynda tyń bastamalar kóterip, ony tabysty júzege asyrý – basty mindet. Qazir jetistikke máz bolyp otyratyn zaman emes. Jumysty tyń qarqynmen jalǵastyrý kerek», dedi Prezıdent.
Osy jerde bul saılaý sonshalyqty mańyzdy ma edi degen saýaldyń jaýaby tabylady: mańyzdy, óte mańyzdy! О́ıtkeni Qazaqstan qoǵamy bul saılaý úshin óte qymbat qun tóledi. Biz endi «Qasiretti qańtar» oqıǵasynyń umtylmaýyna ǵana emes, qaıtalanbaýyna da jaýaptymyz. Onyń jaýaby – ádilet saltanat qurǵan elde ómir súrý bolsa kerek.
Márege jetken Májilis pen máslıhat depýtattaryn saılaý – ádildik jolyndaǵy taǵdyrsheshti árekettiń aıǵaǵy.
