Ulystyń uly kúninde Abaıǵa arnalǵan eskertkish ashyldy

Aqynnyń músini Taldyqorǵandaǵy Bıken Rımova atyndaǵy drama teatrynyń aldyna qoıyldy. Saltanatty sharaǵa oblys ákimi Beıbit Isabaev, Parlament Senatynyń birqatar depýtaty, Abaı oblysynan arnaıy ókilderi, Qunanbaı qajynyń tikeleı urpaǵy Hýsman Verlıshev, sol sııaqty óner maıtalmandary, óńirdegi ardagerler, zııaly qaýym ókilderi, qala turǵyndary qatysty.  

Jalpy eskertkishtiń tuǵyry granıt pen mramordan daıyndalǵan, músini qoladan quıylǵan. Tuǵyry 5,3 metr, músini - 3,6 metr. Eskertkishtiń sáýletshisi - Qazaqstan Respýblıkasynyń qurmetti qurylysshysy, uzaq jyl Sáýletshiler odaǵyn basqarǵan sáýletshi Aqmyrza Rústembekov. Músinshisi - Meıirlan Ázmaǵanbetov. Ol buǵan deıin Taldyqorǵandaǵy Súıinbaı Aronulynyń, Ǵalı Ormanovtyń, Nurǵısa Tilendıevtiń eskertkishterin, «Aıaly alaqan» kompozısııasyn jasaǵan. 

Eskertkishtiń ashylý saltanatynda oblys ákimi arnaıy sóz sóıledi.

«Halyqtyń múddesinen, kóptiń maqsat-muratynan týyndaǵan sol taqyryptar áli kúnge ózektiligin joıǵan joq. Qaıta ondaǵy adamgershilik qundylyqtar, moral fılosofııasy, tolyq adam ilimi jyl ótken saıyn jańǵyryp, zaman ozǵan saıyn jańa qyrlary ashylyp jatyr. Qazaqstannyń jańa dáýirin jasap, ádiletti qoǵam qurý barysynda biz taǵy da Abaıǵa júginemiz. Aqyn aıtqan ystyq qaırat, nurly aqyl, jyly júrek árqaısymyzǵa asa qajet ekenin uǵynamyz. Osy úsh asyl qasıettiń adamdy alǵa jeteleıtinin, aqıqatqa bastaıtynyn túısinemiz. Abaı qazaqpen birge jasaıdy. Onyń shyǵarmalary búgingi qoǵamǵa ǵana emes, keleshek urpaqqa da rýhanı nár berip, tereń taǵylymyn tanytatyny anyq», dedi Beıbit Isabaev.