Asa qyzyqty báseke jartylaı jeńil salmaqtaǵy Nursultan Qasymhanov pen ırandyq Morteza Rezaı (6-2) arasynda ótti. 31 jastaǵy Jetisý oblysy Alakól aýdanynyń týmasy buǵan deıin qazaq kúresimen aınalysqan. 2014 jyldan beri aralas jekpe-jekke myqtap den qoıyp, Almatyda irgetasy qalanǵan «Alash Praıd» klýbynyń namysyn qorǵady. Sol aralyqta Kasymhanov 14 kezdesý ótkizip, 10 ret jeńiske jetti. Bul básekelerdiń teń jartysyn aıqyn basymdyqpen aıaqtady. 2018-2021 jyldary Cheshenstannyń ASA promoýsheninde kúsh synasty. Atalǵan jarysta bes ret oktagonǵa shyǵyp, úsheýinde jeńilistiń kermek dámin tatty. Sońǵy ret Máskeýde Reseıdiń myqty faıteri Alekseı Polpýdnıkovtan utylǵannan keıin bir jarym jyl ýaqyt demaldy.
Alataý baýraıynda Nursultan Iran sportshysy Rezaımen aıanbaı aıqasty. Alǵashynda Parsy eliniń ókili ájeptáýir qarsylyq kórsetti. Biraq ýaqyt ozǵan saıyn qarqynyn kúsheıtken qandasymyz ońtaıly sátti utymdy paıdalanyp, qarsylasyn uryp jyqty. Morteza qulaǵan bette birneshe aýyr soqqy jumsap úlgerdi. Tóreshiniń jekpe-jekti toqtatýdan basqa amaly qalmady.
Atalǵan týrnırdiń basty básekesinde jartylaı jeńil salmaqtaǵy Aıvaz Aıdınov (5-1) pen qyrǵyzstandyq Ilimbek Aqylbekuly (6-1) kúsh synasty. Birinshi raýndta jerlesimiz qarsylasyn nokdaýnǵa jibergen edi. Biraq bul jaǵdaı Alataýdyń arǵy jaǵynan kelgen jigittiń saǵyn syndyra alǵan joq. Aıqas alańynda baryn salǵan ol úshinshi raýndta Aıdyndy «qylqyndyrý» ádisimen utty. Osylaısha, Asylbekuly atalǵan promoýshenniń altyn belbeýimen qatar, 10 myń AQSh dollary kóleminde syıaqyny qaltasyna basty.
