Álem chempıony atandy

Negizi bul ataq Alehandro Me­ne­seske tıesili edi. Byltyr kók­temde Ulybrıtanııada ótken jarysta ol jergilikti bylǵary qolǵap sheberi Sem Maksveldi aıqyn basymdyqpen utyp, álem chempıony atandy. 32 jastaǵy Meksıkanyń marqasqasy kásip­qoılar arasynda 21 kezdesý ót­kizip, 16 ret jeńiske jetti. To­ǵyz qarsylasyn esinen tandyrdy. Mine, osy derekterdiń ózi-aq Menesestiń osal boksshy emestigin ańǵartsa kerek.

Janqosh Turarovtyń júrip ótken joly qazaq jankúıerleriniń kóz aldynda. Talaı talantty jas­tardyń tomaǵasyn sypyrǵan Sa­ǵatbek Musahanovtaı maıtalman mamannyń qol astynda jattyǵatyn qandasymyzdyń kásipqoılar arasynda kúsh synasyp júrgenine 14 jyldan asty. Sol aralyqta 26 ret judyryqtasqan Janqosh birde-bir ret jeńilistiń kermek dámin tatqan emes. 19 qarsylasyn julyndaı ushyrdy. Buǵan deıin Turarov Qazaqstannan bólek, AQSh, Domınıkan Respýblıkasy, Ekvador jáne Ulybrıtanııada óner kórsetti.

О́zine ǵana tán judyryqtasý mánerimen kózge túsip, jankúıer­ler júregin jaýlap alǵan Janqosh osy kúnge deıin de birneshe or­tańqol nusqalar boıynsha chem­pıondyq belbeýdi ıelendi. Desek te, osy sátti ol uzaq kútken edi. Al­matyda ótken boks keshinde onyń basymdyǵy birden baıqaldy. Me­neses bir qaraǵanda qopaldaý jáne epsizdeý kóringenimen, ashyq aıqasqa barýdan esh qaımyqpaıtyn naǵyz qaısar jigit eken. Boıy men qolynyń uzyndyǵyn óte jaqsy paıdalanady. Jekpe-jek barysynda ol «ólispeı berispeımin» degendeı syńaı tanytyp, Turarovqa ájeptáýir qarsylyq kórsetti. Tipten, birneshe aýyr soqqylaryn da darytty.

Qazaq boksshy bul jerde qojaıyn kim ekenin kórsetý úshin únemi shabýyl ótinde júrdi. Ásirese, onyń úshinshi jáne tór­tinshi raýndtarda jumsaǵan aýyr soqqylary qarsylasyn tál­­tirektetip tastaǵandaı kó­rindi. Tek gongtyń arqasynda ǵana Alehandro «aman» qaldy. To­ǵyzynshy raýndtyń sońynda meksıkalyqtyń kózi qanap ketti. Úzilis kezinde dárigerler oǵan kó­mek kórsetip, jekpe-jekti jal­ǵastyrýǵa ruqsat berdi. Biraq Menesestiń bapkerleri boksshynyń densaýlyǵyn oılap, 10 raýndta rıngtiń ortasyna shyǵarmady. Sóıtip, tehnıkalyq nokaýtpen jeńiske jetken Janqosh Turarov álem chempıony atady!

«Almaty Arenada» ótken jarysta taǵy birneshe óte qyzyqty jekpe-jekterdi tamashaladyq. Atap aıtsaq, Bekman Soılybaev (15-1, 6 KO) osyǵan deıin eshkimnen jeńilmegen fılıppındik Je­nel Laýsany (12-0, 7 KO) úshin­shi raýndta búıirden uryp qula­typ, WBA Inter-Continental nus­qasynyń altyn belbeýin ıelendi. Dáýren Eleýsinov (10-2-1, 9 KO) ózbekstandyq Bahrom Paıazov (22-21, 15 KO) ekinshi raýndta esinen tandyrdy. Tanymal bapker Dastan Sádýaqasovtyń shákirti Baýyrjan Beıildınovtiń de óneri jergilikti jan­kúıerlerdiń kóńilinen shyq­ty. Teń dárejede ótip jatqan báse­keniń tórtinshi raýndynda ol óz qar­sylasyn baýyrdan oń­dyrmaı uryp, nokaýtqa jiberdi.