Bıylǵy dúnıejúzilik doda da Saıtamada ótti. Osy jarysta biz Mıhaıl Shaıdorovqa aıryqsha úmit arttyq. Biraq byltyr Tallınde jalaýy jelbiregen jastar arasyndaǵy álem birinshiliginde kúmis medaldy moınynda jarqyratqan 19 jastaǵy jerlesimiz Kún shyǵys elinde senim údesinen shyǵa almady. Qysqa baǵdarlamada 18-oryndy (75,41 upaı) qanaǵat tutqan Shaıdorov erkin baǵdarlamada da ózin jaqsy qyrynan kórsete almady. Nátıjesinde, 236,93 upaımen 14-orynda qalyp qoıdy. Bul jarysta byltyrǵy jylǵy álem chempıony, úsh dúrkin Olımpııa oıyndarynyń júldegeri Sema Ýno bas júldeni oljalady. Japonııanyń juldyzy 301,14 upaıdy enshiledi. Ońtústik Koreıanyń ókili Chha Chjýn Hvan (296,03 upaı) kúmis alsa, amerıkalyq Ilıa Malının (288,44 upaı) qolaǵa qol sozdy.
Áıelderdiń saıysynda da jergilikti sportshynyń baǵy jandy. Beıjiń Olımpıadasynda qos qolany ıelenip, 2022 jyly Monpelede top jarǵan Kaorı Sakamoto (224,61 upaı) bul joly da altynnan alqa taqty. Koreıalyq Lı He In (220,94 upaı) ekinshi oryndy ıemdense, belgııalyq Lýna Hendrıks (210,42 upaı) úshinshi satyǵa taban tiredi.
Bıshilerdiń básekesinde baq synaǵan Gaýhar Naýryzova men Boısangýr Datıev qysqa baǵdarlamada 33 satyǵa turaqtap, jarystyń fınaldyq bóliginde óner kórsetý quqyǵynan aıyryldy. Básekeniń bul túrinde amerıkalyq Medıson Chok pen Evan Beıts (226,01 upaı) top jardy. Italııalyq Sharlen Gınıar men Marko Fabbrı (219,85 upaı) ekinshi oryn alsa, kanadalyq Paıper Gılles pen Pol Pýare (217,88 upaı) úshinshi satyǵa jaıǵasty. Juptyq saıysta japonııalyq Rıký Mıýra men Rıýıtı Kıhara (222,16 upaı) qarsylas shaq keltirmedi. AQSh-tan kelgen Aleksa Knırım men Brendon Freızer (217,48 upaı) jáne ıtalııalyq Sara Kontı men Nıkkolo Machıı (208,08) júldegerler qatarynan kórindi.
