Til saıasaty komıtetiniń tóraǵasy taǵaıyndaldy

«Ǵylym jáne joǵary bilim mınıstriniń buıryǵymen Erbol Erdembekuly Tileshov Qazaqstan Respýblıkasy Ǵylym jáne joǵary bilim mınıstrligi Til saıasaty komıtetiniń tóraǵasy qyzmetine taǵaıyndaldy», delingen Úkimet taratqan habarlamada.

Erbol Tileshov 1965 jyly Qaraǵandy oblysynda dúnıege kelgen.

Abaı atyndaǵy Qazaq Eńbek Qyzyl Tý ordendi pedagogıkalyq ýnıversıtetin bitirgen.

1992-2001 jyldary S. Seıfýllın atyndaǵy Aqmola ýnıversıtetiniń qazaq ádebıeti kafedrasynda oqytýshy, aǵa oqytýshy bolyp jumys istedi.

2001-2002 jyldary L. Gýmılev atyndaǵy Eýrazııa ulttyq ýnıversıtetiniń qazaq ádebıeti kafedrasynyń dosenti qyzmetin atqardy. 

2002-2004 jyldary L. Gýmılev atyndaǵy Eýrazııa ýnıversıteti Gýmanıtarlyq ınstıtýty dırektory orynbasarynyń mindetin atqarýshy, dırektorynyń orynbasary boldy.

2004-2007 jyldary «Respýblıkalyq memlekettik tildi jedeldetip oqytý ortalyǵy» RMQK dırektorynyń orynbasary, dırektory bolyp jumys istedi.

2007 jyldan 2012 jylǵa deıin jeke kommersııalyq qurylymdarda eńbek etti.

2012-2015 jyldary – Astana qalasy Tilderdi damytý basqarmasy bastyǵynyń mindetin atqarýshy, basshysy.

2015-2022 jyldary – «Shaısultan Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵy» RMQK dırektorynyń mindetin atqarýshy, dırektory, atqarýshy dırektory.

2022 jylǵy naýryzdan bastap qazirgi ýaqytqa deıin «Shaısultan Shaıahmetov atyndaǵy ulttyq ǵylymı-praktıkalyq ortalyǵy» KeAQ bas dırektory qyzmetin atqardy.