Tumandy Albıon elindegi tolaǵaı tabysynan keıin Elena Rybakına «Kezinde meni Qazaqstan qatty qoldady. Sonyń qaıtarymy bolýy kerek. Meniń endigi mindetim – daryndy jastarǵa barynsha qoldaý kórsetý. Sol úshin jas órenderge arnap týrnır uıymdastyrýdy nemese qarjylaı kómek kórsetýdi kózdep otyrmyn», dep tebirene sóılegen edi.
Elena aıtqan sózinde turdy. Taıaýda ol osy sport túrin serik etken jas órender arasynan 14 oıynshyny tańdap alyp, solardyń árqaısyna 2,5 mılllıon teńgeden tabys etti. Áıgili tennısshiniń shapaǵatyn kórgender arasynda Lınara Bólesheva, Polına Barabanova, Ámına Nurmahan, Arıana Gogýlına, Satıma Tóregen, Eva Korysheva, Álbına Kákenova, Arýjan Arystanbekova, Dana Baıdáýlet, Ińkár Dúısebaı, Aııa Núpbaı, Polına Slepsova, Sandýǵash Kenjebaeva jáne Zara Dárken syndy qarymdy qyzdar bar.
23 jastaǵy Elena Rybakına Máskeýde dúnıege kelgenimen, úlken sporttaǵy tolaǵaı tabystarynyń barlyǵyna Qazaqstannyń týy astynda óner kórsetken kezde qol jetkizdi. Ol bizdiń eldiń azamattyǵyn 2018 jyldyń jazynda aldy. Sol ýaqyttan beri kóptegen dúbirli dodada daralandy. Atap aıtsaq, byltyr Ýımbldonda bas júldeni oljalasa, bıyl Aýstralııa ashyq birinshiliginiń fınalynda oınady. Tokıo Olımpıadasynda tórtinshi orynǵa taban tirep, WTA týrnırlerinde tórt ret top jardy. Atalǵan jarystarda ataǵy alysqa jaıylǵan kóptegen saqa oıynshyny tize búktirdi. Qazirgi kezde ol álemdik reıtıngte jetinshi orynda tur. Osy kúnge deıin Qazaqstannyń birde-bir tennısshisi dál osyndaı deńgeıge jetken emes.
