«Shaǵyn jáne orta kásipkerlik ekonomıka men eńbek naryǵynyń qozǵaýshy kúshine aınalýǵa tıis. Bul jóninde kóp aıtyldy. Biraq atalǵan baǵytta aıtarlyqtaı ilgerileý bolǵan joq. Demek, ekonomıkalyq saıasatqa ózgeris engizý qajet.
Shaǵyn jáne orta bıznesti tolyqqandy qoldaý úshin keshendi sharalar qabyldaý kerek. Olar elimizdi damytýda mańyzdy ról atqaratynyn tolyq sezinýge tıis. Bizge Qazaqstan ekonomıkasyn damytý jolynda ózine jaýapkershilik ala alatyn kásipkerlerdiń «jańa tolqyny» qajet. Onyń bel ortasynda ákimshilik resýrstarǵa ıek artpaı, kásipkerlik talanty men eńbekqorlyǵynyń arqasynda kásibin tabysty júrgize alǵan bıznesmender bolýǵa tıis», dedi Prezıdent.
Memleket basshysynyń aıtýynsha, ondaı adamdarǵa elimizde óz bıznesin damytýǵa múmkindik berý jáne naqty kómek kórsetý mańyzdy.
«Qazaqstannyń qazirgi ekonomıkalyq modeli, eń aldymen, shıkizat sektoryna ınvestısııa tartýǵa negizdeledi. Sondyqtan ulttyq býrjýazııanyń negizin quraıtyn orta bıznes júıesiz damyp jatyr. Tek jekelegen aımaqtarda ǵana oń qarqyn baıqalady. Jalpy Úkimetke ekonomıkanyń negizgi salalaryna qomaqty ınvestısııa, sonyń ishinde sheteldik ınvestorlardy tartý mindeti júkteledi. Olar orta bıznestiń damýyna tyń serpin berýge tıis. Bul máseleni sozbalańǵa salýǵa bolmaıdy», dep atap ótti ol.
