Júrek jylýy

Naýryz merekesi qarsańynda Pre­zı­dent «Júrek jylýy» qaıyrym­dylyq aksııasyna qatysty. Aksııanyń máni – naýryz aıy boıyna halyqtyń áleýmettik osal toptaryna qamqorlyq kórsetip, kópbalaly otbasylardan, múmkindigi shekteýli jandardan, zeınetkerlerden kelip túsken hattarda jazylǵan ótinish-tilekterdi oryndaý.

Qaıyrymdy iske Astana qalasy ákimdiginiń «Astana jastary» jastar resýrstyq ortalyǵynyń eriktileri uıytqy bolǵan. Olar 21-23 naýryz aralyǵynda EKSPO aýmaǵyndaǵy kıiz úılerdiń birinde aksııany keńinen nasıhattady. Osy oraıda volonterler Memleket basshysynan sandyqtan alǵashqy hatty alyp oqýdy surady. Qasym-Jomart Toqaev hat ıesiniń tilegi oryndalatynyn jetkizip, osynaý ıgi isti bastaǵan jastarǵa rızashylyǵyn bildirdi. О́tinishte Astana turǵyny tonometr suraǵan edi.

Soǵan sáıkes, Astana ákimi Jeńis Qasymbek Gúljahan Sydyqovamen kezdesip, Memleket basshysynyń atynan tonometrdi tabystady. Sondaı-aq oǵan materıaldyq kómek kórsetilip, sanatorııge joldama beriledi. Gúl­jahan Sydyqova Prezıdent pen «Júrek jylýy» qaıyrymdylyq aksııasyna qatysýshylarǵa alǵysyn bildirdi. Budan bólek Aqparat jáne qoǵamdyq damý mınıstri Darhan Qydyráli segiz jasar Eralynyń úıine baryp, ózi hatta suraǵan syılyqtardy tabys etti.

Igi istiń izin «Jibek Joly» telearnasy, «Magnum» sýpermarketter jelisi, «Qazaqstan temir joly» ulttyq kompanııasy jáne elimizdegi joǵary oqý oryndary da jalǵastyrýda. Astanadaǵy M.S. Nárikbaev atyndaǵy KazGIýÝ ýnıver­sıteti jaqsylyq sandyǵynan bir hatty aldy. Onda tilek joldaýshy Alfııa júgirýge arnalǵan sporttyq aıaq kıim alǵysy kelgenin jazǵan. Ýnıversıtet ujymy tek sporttyq aıaq kıim ǵana emes, júgirýge qajetti barlyq sporttyq kıimmen jabdyqtaıtynyn jetkizdi. Keıin «Júrek jylýy» chellendjin Atyraýdaǵy Safı О́tebaev ýnıver­sıteti qabyldap, eriktiler tobyna arnaıy habarlasty. Olarǵa tilek sandy­ǵynan Nazerke esimdi mektep oqýshy­synyń haty tústi. Astana qalasy­nyń turǵyny qarshadaıynan qolmen tiginshilik ónerin úırenip júrgenin, endigi armany tigin mashınasyn alý ekenin aıtqan. Oǵan jaýaptylar munaıly astanadan sálem joldap, tilegin oryndaıtynyn Facebook paraqshalarynda jazyp qaldyrdy.

Qaıyrymdylyqty janyna jalaý etken jandardyń qatarynda eń úzdik fýtbolshy Samat Smaqov ta bar. Ol nómiri 277-hatty alyp, Aıbópe San­jarqyzynyń armanyn oryndady. О́tinish bildirýshi kýrsqa qatysý úshin arnaıy tigin mashınasyn suraǵan.

– Jasym on altyda. Naýryz aıy­nyń basynda dostarymnan «Júrek jylýy» aksııasy týraly esti­dim. О́zim kópbalaly otbasynan bolǵandyqtan, hat jazýǵa sheshim qabyldadym. Kıim tikkendi jaqsy kóremin, sondyqtan syılyq retinde tigin mashınasyn suradym. Armanym sonshalyqty tez oryndalady dep oılamadym. Ma­ǵan demeýshi habarlasqanda qatty qýan­dym. Tipti sol kúni ákelip berdi. Armandar oryndalady, tek sený kerek. Alǵysym sheksiz, – dedi A.Sanjarqyzy.

Qazaqtyń dástúrli ádep júıesinde meıirimdilik jurtshylyq arasyndaǵy adamgershilik, izgilik pen izettilik, ımandylyq pen ınabattylyq sekildi asyl qasıettermen úndestik tapqan. Osy oraıda Júsip Balasaǵunnyń «Kir tıgizbeı usta oıyńnyń óresin, meıirim etseń – meıirimdilik kóre­siń» degeni aksııanyń negizin asha túskendeı. Sondyqtan  jaýaptylar bul qaıyrymdylyq tizbegin jyl boıy jalǵastyrmaqshy. Endi óti­nish-tilekterdi qabyldaýdyń ekinshi kezeńi mamyr aıynda bastalady dep jos­parlanǵan.

Jalpy, aksııa barysynda volonterler azamattardan 300-ge jýyq hat qabyldaǵan. Uıymdastyrýshylardyń aıtýynsha, qorjynnan kez kelgen adam hat alyp, jerlesteriniń arman-tilegin oryndaı alady.