Qalalyq densaýlyq saqtaý basqarmasynyń málimetinshe, naýryzdyń 24-inen 25-ine qaraǵan túni qazaqstandyq týrıster Mysyrdyń Sharm-el-Sheıh kýrortynan Almatyǵa qaıtyp kele jatqan.
Egde jastaǵy áıelde júrek talmasynyń barlyq belgileri baıqaldy. Ushaq Almatyǵa qonǵansha 4 saǵat boıy medısına qyzmetkerleri reanımasııalyq sharalardy júrgizip, shuǵyl kómek kórsetti.
«Bir kezde aldynda otyrǵan áıel ábigerge tústi ári onyń qolynda náreste boldy. Sodan keıin stıýardtar ushaqta dárigerler bar-joǵyn surady. Medısına ýnıversıtetiniń stýdentteri jáne men jaýap berdik. Bastapqy tekserý kezinde mıokard ınfarktisiniń damý qaýpi bar dep kúdiktendim. Áıel es-tússiz jatqan, oǵan deıin qusqan, sýyq ter shyqty, tamyr soǵysy áreń sezildi, qan qysymy tómen boldy. Sodan keıin Hattama boıynsha áreket ettik: tamyrlyq kirý jasadym, qusýdan asfıksııany boldyrmaý úshin aýyz-jutqynshaqty tazaladyq, sodan keıin júrekke túsetin júktemeni azaıtý úshin naýqastyń aıaǵyn 60°-qa kóterdik. Naýqasty ottegi beretin Bobrov apparatyna qostyq. Stýdentter belsendi túrde kómektesti», dedi Almaty №4 qalalyq klınıkalyq aýrýhana neırohırýrgııa bólimshesiniń meńgerýshisi Nurjan Ájibekov.
Der kezinde qabyldanǵan sharalardyń nátıjesinde qan qysymy 80/60-tan 130/80-ge, qanyqtylyq 87-den 96-ǵa kóterilgen. Áıel esin jııa bastaǵan.
Qýanyshqa oraı, dáriger jyl saıynǵy eńbek demalysyna shyǵyp, sol kúni otbasymen demalystan keıin úıine qaıtyp bara jatqan.
Kýágerlerdiń aıtýynsha, ushaqta bolǵan dáriger men stýdentterdiń arqasynda naýqas aman qalǵan. Ushaqta kómek kórsetken S.D.Asfendııarov atyndaǵy QazUMÝ stýdentteriniń esimderi de belgili: Qajyrov Dáýlet, Jarqyn Rahat jáne Saıda Barmaǵambetova.
Jaqyndarynyń aıtýynsha, Kúljamal Rahmettýllaqyzy qazirgi tańda ózin jaqsy sezinedi. Ushaq Almatyǵa qonǵannan keıin naýqasty birden aýrýhanaǵa jetkizgen.
