Ǵylym • 30 Naýryz, 2023

Qazaqstanda 3D prınterler óndirisi iske qosylady

Bıyl alǵash ret Eýrazııa ulttyq ýnıversıtetinde ártúrli formattaǵy 3D prınterler qurastyratyn shaǵyn óndiris ashylady. Addıtıvti tehnologııany qurylys jáne basqa ındýstrııalarda qoldanýǵa bolady. Josparlanǵan jyldyq óndiristik qýattylyq - 300 prınterge deıin.

Marjan TILEÝBEK

Ýnıversıtettik ǵylym óndirispen sabaqtastyqty belsendi damytyp jatyr. EUÝ ǵalymdary óndirýshilermen birlese 3D prınterler shyǵarýdyń ınnovasııalyq tehnologııalaryn qoldanýǵa nıetti. О́ndiris «ENU-Lab» ǵylymı-óndiristik ortalyǵynyń bazasynda qurylady.

«3D prınterlerdi shyǵarý bastapqyda qurylys jáne basqa salalarda josparlanǵan. Bolashaqta «ENU-Lab» ǵylymı-óndiristik ortalyǵynyń bazasynda 3D prınterdi geopolımer negizindegi jańa qurylys materıaldaryn shyǵarý úshin paıdalanyp, odan ári kommersııalandyrý josparda bar. Osy segmenttegi jańa tehnologııalar qoldanylatyn eskersek, óndiris Qazaqstanda birinshi ret iske qosylady», dep túsindirdi EUÝ ınnovasııalardy damytý departamentiniń dırektory Ásel Djeksembaeva.

Shyǵarylatyn taýardyń negizgi tapsyrys berýshileri elimizdiń jáne shet memleketterdiń tehnoparkteri, bilim berý, ǵylymı mekemeleri, ındýstrııalyq kásiporyndary bolmaq. О́nimdi eksporttaý múmkindigi bar.

«Qazir biz elimizdiń aýmaǵynda jetkizý jáne tehnıkalyq qoldaý tehnologııalaryn ázirleımiz. Al keıin syrtqy naryqqa shyǵýdy josparlap otyrmyz. 3D prınterlerimizdi satyp alýǵa daıyn О́zbekstan, Qyrǵyzstanmen baılanys ornattyq», dedi «SpaceLab» JShS dırektory Arman Bekembaev.

Jobaǵa EUÝ stýdentteri de qatysyp, praktıkalyq tájirıbelerin shyńdaý jáne ǵylymı zertteýler júrgizýge múmkindik alady.

Aıta keteıik, 2022 jyldyń qyrkúıeginde EUÝ zertteý ýnıversıteti mártebesin aldy. Ýnıversıtet bilim, ǵylym jáne óndiristiń ózara sabaqtastyǵyn belsendi damytyp keledi.