Álıhan Smaıylov alda atqaratyn jumystar jaıynda aıtty

«Qurmetti Qasym-Jomart Kemeluly! Qurmetti depýtattar! Maǵan artqan senimderińiz úshin shynaıy rızashylyǵymdy bildirgim keledi. Bul – men úshin úlken jaýapkershilik. Qurmetti Qasym-Jomart Kemeluly, Siz aıqyndap bergen elimizdiń áleýmettik-ekonomıkalyq damýy, halyqtyń ómir súrý sapasy men ál-aýqatyn odan ári arttyrý jónindegi mindetter Úkimet jumysynyń negizgi basymdyqtary bolady.

Eń aldymen, biz Memleket basshysynyń Saılaýaldy baǵdarlamasyn jáne «Amanat» partııasynyń baǵdarlamasyn iske asyramyz. Sonymen birge basqa da partııalar men depýtattardyń, bıznes-qaýymdastyqtar men azamattardyń syndarly usynystaryn eskeremiz. Orta merzimdi kezeńde ekonomıkanyń ósimin 5%-ǵa deıin jetkizý, osy jyldyń aıaǵyna deıin ınflıasııany 2 ese tómendetý – biz úshin asa mańyzdy mindet», dedi Álıhan Smaıylov.

Úkimet basshysynyń aıtýynsha, kásipkerlikti qoldaý jáne bıznes-klımatty jaqsartý jónindegi keshendi sharalar, sondaı-aq bıznestiń túıtkildi máselelerin sheshý, halyqty jumyspen qamtý jáne azamattardyń naqty tabysyn ósirý – negizgi baǵyttardyń biri.

Ekonomıkany ártaraptandyrýǵa, ishki naryqty otandyq taýarlarmen qamtamasyz etýge jáne qosylǵan quny joǵary shıkizattyq emes taýarlar óndirisin ulǵaıtýǵa basymdyq beriledi.

«El ekonomıkasyna, birinshi kezekte, óńdeýshi salalarǵa aýqymdy ınvestısııalar tartý boıynsha sharalar qabyldanady. Aýyl sharýashylyǵyn damytý jáne azyq-túlik qaýipsizdigin qamtamasyz etý úshin keshendi jumys atqarylady.

Sonymen qatar energetıka salasyn damytý jáne kommýnaldyq ınfraqurylymdy jańǵyrtý máseleleri óte mańyzdy. Ishki naryqty janar-jaǵarmaımen qamtamasyz etýge erekshe nazar aýdarylady. «Tarıf ornyna – ınvestısııa» baǵdarlamasyn iske asyrý elektr jáne kommýnaldyq jelilerdiń tozýyn tómendetýge múmkindik beredi.

«Aýyl – El besigi» jobasy aıasynda aýyldyq ınfraqurylymdy jańǵyrtý keńeıtiledi. Kólik jáne logıstıka salasynda ótkizý qabiletin arttyrýǵa jáne halyqaralyq dálizderdi damytýǵa basymdyq beriledi. Bilim berý jáne densaýlyq saqtaý salalarynda qyzmetterdiń tıimdiligi men sapasyn jaqsartý, sonymen qatar sıfrlandyrýdy ári qaraı jalǵastyrý jáne memlekettik biryńǵaı sıfrlyq platformany engizý bizdiń jumysymyzdyń mańyzdy baǵyttary bolady. Úkimettiń aldynda qoıylǵan mindetterdi sheshý úshin tıisti sharalar qabyldanady. Parlament depýtattarymen ózara birlesip, úılesimdi jáne nátıjeli jumys jasaımyz dep senim bildiremin», dedi Premer-mınıstr óz sózinde.