Atalǵan qoıylymnyń fılosofııalyq negizi, ıdeıalyq mazmuny men rejısserlik jumysy «ALEM» zamanaýı horeografııa baletiniń kórkemdik jetekshisi Baqyt Tajınovtiń bastamasymen iske asyp otyr. Eksperımenttik horeografııa stılindegi bı nómirleri zamanaýı kompozıtorlardyń mýzykasymen súıemeldengen. Balet ártisteri plastıka, ıkemdilik, tonýs jáne mýzykany erekshe sezinýdi talap etetin – «ishteı seziný arqyly» bıleı alatyn biregeı tehnıkany meńgergenin kezekti ret kórsetti. Qoıylym fılarmonııanyń basqa shyǵarmashylyq ujymdarynyń aspapshy-mýzykanttary men shaqyrylǵan balet ártisteriniń qatysýymen erekshe. Sonyń biri – Petropavl qalasynan kelgen erekshe qajettilikteri bar adamdarǵa arnalǵan «Sensitive» bı teatrynyń solısi Danııal Kangojın. Osyndaı birlesken qoıylym E.Rahmadıev atyndaǵy MAF balet ártisteri úshin alǵashqy ınklıýzıvti tájirıbe bolǵanyn da aıta keteıik.
Qoıylymnyń qoıýshy-baletmeısterleri – Ulan Izenaev pen Janna Seıitova, balet repetıtory – Janat Sársembaev. Shaqyrylǵan qoıýshy-baletmeısterler – «Sensitive» bı teatrynyń bas baletmeısteri Olga Rostovshıkova (Petropavl), Ulttyq ulany Án jáne bı ansambliniń kórkemdik jetekshisi jáne qoıýshy-horeografy Gúlmıra Rasheva (Astana).
Astanada ótken premeradan keıin plastıkalyq dıvertısment qoıylymy gastroldik saparǵa shyqpaq. Máselen, 30 naýryzda Úkili Ybyraı atyndaǵy Aqmola oblystyq fılarmonııasynyń konsert zalynyń sahnasynda «Solo» qoıylymyn kókshetaýlyq kórermender halqy tamashalaıdy. Al 31 naýryzda ónerpazdar Petropavlda Aqan seri atyndaǵy Soltústik Qazaqstan oblystyq fılarmonııasynda óner kórsetedi.
«Alem» zamanaýı horegrafııa baletiniń quramynda kúrdeli horeografııalyq tapsyrmalardy oryndaı alatyn kásibı bıshiler jumys isteıdi. Olardyń sheberligi akterlik daryndylyqpen, oryndaý mánerliligimen tolyqqan. Ártister óz konsertterinde horeografııalyq ónerdiń baılyǵy men sulýlyǵyn kórsete otyryp, klassıkadan modernge deıingi san alýan bı stılderin meńgergen.
