Ádette, alaıaqtar baǵdarlamalyq qamtylym arqyly aýystyrylatyn nómirlerdi paıdalanady. Sondyqtan byltyr baılanys operatorlary telekommýnıkasııa jelilerindegi ruqsat etilmegen áreketterdi, onyń ishinde alaıaqtyq áreketterdi (antıfrod júıesi) boldyrmaý úshin yntymaqtastyq týraly kelisimge qol qoıdy. Máselen, 2022 jyly atalǵan júıeniń nátıjesinde baılanys jelilerindegi aýysymdyq nómirlerden shamamen 18 mln sheteldik qońyraý buǵattaldy, 2023 jyl bastalǵaly bul kórsetkish 8,5 mln qońyraýdy quraǵan.
Sondaı-aq vedomstvo Ishki ister mınıstrligimen jáne baılanys operatorlarymen birlesip, byltyr alaıaqtyq jaǵdaılarynyń jıilep ketýine baılanysty el turǵyndarynyń habardarlyǵyn arttyrý jumysyn uıymdastyryp, eskertý sıpatyndaǵy SMS-habarlamalardy jiberip otyrýdy qolǵa aldy. Máselen, «Ksell» AQ alaıaqtyq nómirlerdi anyqtaý jáne buǵattaý, sondaı-aq kelip túsetin alaıaqtyq qońyraýlardy shekteý júıesin engizdi. Júıeniń tıimdiligin arttyrý jáne basqa mobıldi operatorlardy nómirleı otyryp, qońyraýlardy buǵattaý úshin «Mobaıl Telekom-Servıs» jáne «KaR-Tel» seriktestikterimen birlesip, qońyraý kelip túsetin nómirdi aýystyrý mánine halyqaralyq trafıkti ózara tekserý úshin ıntegrasııalyq orta engizildi.
Qazir tirkelgen baılanys operatorlarymen mobıldi nómirlerden qalalyq nómirlerge jáne qalalyq nómirlerden mobıldi nómirlerge aýystyrýdy boldyrmaý boıynsha sharalar pysyqtalyp jatyr.
Sonymen qatar mınıstrlik azamattardy alaıaqtardyń qurbany bolmas úshin qaýipsizdiktiń negizgi erejelerin saqtaýǵa shaqyrdy. Iаǵnı ınternet-bankıngtegi nemese mobıldi qosymshadaǵy jeke kabınettiń parolin eshkimge aıtpaý kerek. «Derbes derekterińizdi, bank kartańyzdyń derektemelerin, kartanyń qoldanylý merzimin, CVC/CVV-kodyn (bank kartasynyń artyndaǵy úsh san, kartanyń túpnusqalyǵyn tekserý kody), kod sózin jáne qarajattyń qaldyǵyn beıtanys jandarǵa aıtýǵa bolmaıdy. Jasalǵan operasııany rastaý úshin SMS-kodty eshkimge kórsetpegen abzal», delingen mınıstrlik habarlamasynda.
Vedomstvo elimizde urlanǵan abonenttik qurylǵylardyń (IIM derekteri) tiziliminde bolýy úshin IMEI kodtaryn tekserýdiń sıfrlyq servısi qurylǵanyn, sondaı-aq https://imei.rfs.gov.kz saıtynan urlyq úshin paıdalanylǵan telefondardy qaıda tekserýge bolatynyn eske saldy. Mınıstrlik qyzmetiniń bul baǵyttaǵy jumysy turaqty negizde jalǵasa bermek.
