Mınıstrdiń aıtýynsha, el ekonomıkasyn gazben qamtamasyz etý maqsatynda gaz óndirýdi yntalandyrý boıynsha zańnamalyq ózgerister qabyldandy. Sonymen qatar Qashaǵan, Qarashyǵanaq ken oryndarynda gaz óńdeý boıynsha jańa zaýyttardy iske asyrý jóninde jumystar júrgizilip jatyr.
Nátıjesinde taýarlyq gaz óndirisi 2025 jyly aıtarlyqtaı ósedi dep kútiledi.
«Bıyl I jartyjyldyqtyń sonyna deıin energııa tıimdiligi men taýarlyq gazdy utymdy tutyný jospary ázirlenedi. Ataýly áleýmettik kómek alatyn halyqty qospaǵanda, turmystyq tutynýshylar úshin uqypty tutynýdy yntalandyratyn gazǵa saralanǵan tarıfter tetigi engiziledi», dedi mınıstr.
Bolat Aqsholaqov atap ótkendeı, bıyl 1 shildeden bastap elektr energııasyn biryńǵaı satyp alýshy jáne elektr energııasyn teńgerimdeýshi naryq tetigi negizinde elektr energııasy naryǵynyń jańa modeline kóshý josparlandy.
«Búgingi tańda jumys istep turǵan elektr stansııalaryn jańǵyrtý boıynsha jobalar iske asyrylyp jatyr. Olar 2027 jylǵa qaraı 1 700 MVt-tan astam elektr energııasyn iske qosýǵa múmkindik beredi. Qyzylorda qalasynda jáne Túrkistan oblysynda jalpy qýaty 1 200 MVt-tan asatyn manevrlik qýattardyń qurylysy júrip jatyr. Kókshetaý jáne Semeı qalalarynda jańa jylý elektr ortalyqtaryn salý boıynsha jobalar pysyqtalyp jatyr. Ekibastuz GRES-2 №3-4 bloktaryn salý, sondaı-aq Almaty energııa kesheniniń energııa kózderin jańǵyrtý boıynsha jobalar iske asyrylyp jatyr. Ulttyq elektr jelisin jańǵyrtý, onyń ishinde Batys jáne Ońtústik aımaqtardyń energııa júıesin kúsheıtý, Batys aımaqty Birtutas elektr energetıkasy júıesine qosý jumystary júrgizilip jatyr», dedi mınıstrlik basshysy.
