«AITV nemese adamnyń ımmýn tapshylyǵy – ımmýndyq júıe jasýshalaryna shabýyl jasaıtyn vırýs. Ol aǵzanyń qorǵanys júıesine jaýap beretin T-helperlerdi joıyp, olardyń ornyn ózderiniń kóshirmesimen toltyrady. Vırýs qansha kóp tarasa, adamnyń ımmýnıteti de sonshalyqty álsiz bolady. Sondyqtan retrovırýsqa qarsy terapııa qabyldamaǵan naýqas jıi syrqattanady», deıdi Jambyl oblystyq JITS-ke qarsy kúres jáne aýrýdyń aldyn alý ortalyǵynyń bas dárigeri Aıbek Isaev.
A. Isaevtyń aıtýynsha, boıyn dert meńdegen azamat ýaqtyly emdelmegen jaǵdaıda AITV ımmýn tapshylyǵy sındromyna, anyǵyraq aıtsaq, JITS-ke ulasady eken. Onyń sózine sensek, AITV juqtyrǵandardyń sany óńirde 1502 adamǵa jetken.
«Bul aýrý ár kezeńde ártúrli sımptomǵa ıe bolady. Vırýs juqtyrǵannan keıin alǵashqy 2-4 aptada naýqastyń 40-90 paıyzy ózin sýyq tıgendeı sezinedi. Del-sal bolyp, tamaǵy aýyrady, tońady, denesi qyshıdy, aýyz qýysynda jara paıda bolyp, lımfa bezderi ulǵaıady. Testtiń bári bolmasa da, kópshiligi vırýs arqyly bólinetin antıdenelerdi anyqtaı alady. Jalpy azamattar ár jarty jylda nemese jylyna bir ret JITS-ke test tapsyrýdy ádetke aınaldyrǵan jón. Onyń ústine qazaqstandyqtar tekserýdiń bul túrinen tirkelgen emhanasy arqyly tegin óte alady», deıdi dáriger.
Mamandardyń aıtýynsha, ımmýn tapshylyǵy vırýsyn emdeýge múmkindik mol. Alaıda odan tolyq aıyǵyp ketý múmkin emes. Retrovırýsqa qarsy kúsheıtilgen terapııanyń arqasynda vırýs juqtyrǵan pasıentterdiń ómirin 70-80 jasqa deıin uzartýǵa bolady. Atalǵan terapııa jasýshadaǵy aqýyzdarǵa áser etetin fermentterdiń qyzmetin álsiretedi. Nátıjesinde ımmýn tapshylyǵy JITS-ke aınalmaıdy.
Jambyl oblystyq JITS-ke qarsy kúres jáne aýrýdyń aldyn alý ortalyǵynyń bas dárigeri A. Isaevtyń aıtýynsha, vırýs anyqtalǵan adam eń aldymen JITS ortalyǵyna baryp tirkelý kerek. О́ıtkeni aýrýdy baqylaýda ustaýdyń mańyzy óte zor. Esepte turǵan azamattar kepildendirilgen tegin medısınalyq kómek sheńberinde retrovırýsqa qarsy tegin em alady. AITV juqtyrǵan analardyń balalaryna arnalǵan taǵamdar men dári-dármek tegin beriledi.
«Adamdar jaqyndasýdyń aldynda saqtyqty umytpaǵany jón. Al saqtanbaǵan jynystyq qatynastan keıin kúmándanǵan jaǵdaıda jaqyndasýǵa deıingi jáne jaqyndasýdan keıingi profılaktıka sharalaryn paıdalanǵan lázim. Retrovırýsqa qarsy preparattar – tenofovır jáne emtrısıtabın dep atalady. Bul ádis vırýs juqtyrý qaýpin 90 paıyzǵa deıin tómendetedi. Jalpy alǵanda emdi jynystyq qatynastan keıin alǵashqy 72 saǵat ishinde bastap, dárilerdi 28 kún qabyldaý qajet.
Adamnyń boıyndaǵy ımmýn tapshylyǵy vırýsy – úkim emes. AITV juqtyrǵannan keıin de ómir bar. Indet tyrnaǵyna ilingender de otbasyn quryp, dúnıege perzent ákele alady. Jaqyn adam dert juqtyrǵan jaǵdaıda keýdesinen ıtermeı, qoldaýǵa tyrysý qajet. О́ıtkeni naýqastyń kúızeliske toly bolatyn endigi ómirinde dostary men týystarynyń qoldaýy aýadaı kerek», deıdi A. Isaev.
Jambyl oblysy
