Qaıta ashylǵan «Qorǵas»

Kópke aıan, «Qorǵas» shekara mańy yntymaqtastyǵy halyq­aralyq ortalyǵy – «Nurly jol» jańa ekono­mıkalyq saıasaty men «Jibek joly» ekonomıkalyq beldeýi strategııasy aıasyndaǵy álemde teńdesi joq Qazaqstan men Qytaıdyń birlesken jobasy. Sondyqtan onyń ult úshin mańyzy zor. Karantın kezinde ǵımarattyń ótkel bóligine keń kólemdi jóndeý jumysy júrgizilgen bolatyn. Osy oraıda «Qorǵas» ShYHO» AEA BK (basqarýshy kompanııasy)» AQ ınvestısııalar jáne marketıng departamentiniń dırektory Áset Baıǵaraevtyń bastaýymen týrıster qabyldaıtyn ortalyqta atqarylyp jatqan jumys barysymen tanysyp qaıttyq.

Departament dırek­tory­nyń aıtýynsha, eki bólimnen turatyn ótkizý zalynda týrıs­terdi jaılylyqpen qamta­masyz etýge arnalǵan termınal qaıta jabdyqtalyp, eden tolyǵymen jańartylǵan.

Temir qorshaýlar shyny bólimge aýystyrylyp, árbir pasporttyq baqylaý kabınasyna teplovızorlar qoıylypty. Týrısterdiń kedergisiz ótýi úshin «Blok-A» zalyna kirer aldynda týrnıketter orna­tylǵan. Kedennen aqyly ótýdi qalaıtyn týrıster úshin bıznes-termınal (VIP termınal) jasalǵan. Zaldy kondısıonerleý júıesi jańartylyp, týrıster men olardyń júkteriniń qaýipsizdigin qamtamasyz etý maqsatynda aýmaq jaryq­tandyrylyp, beınekameralar ornatylǵan.

Ortalyq qaıtadan ashyl­ǵannan keıin «Qorǵas» ShYHO-ǵa Qazaqstannyń túkpir-túkpirinen, TMD jáne basqa elderden týrıs­ter kóptep aǵylatyny aqıqat. Son­dyqtan ortalyq qyz­meti barlyq baǵytqa jetil­diri­lip sıfr­landyrylyp, kelý­shilerdi qabyldaý sapa­synyń deńgeıin arttyrýǵa áre­kettenýde. ShYHO aýma­ǵyn­da avtokólik keptelisin bol­dyrmaý maqsatynda avto­mattandyrylǵan turaq júıesin ázirleýdi, jolaýshylar zalynda ana men bala úshin bólek bólme, bank bólimsheleri, dárihana, post-termınal, ban­komat, dúken, kofehana jáne namaz oqıtyn oryn­dar qaras­tyrylǵan. Sondaı-aq Arbat, saýda ortalyqtary, qona­qúı kesheni, fýd-kort, túrli ulttyq taǵamdar meıramhanasy sııaqty týrısterdiń ýaqytty jaıly jáne qyzyqty ótkizýine qolaıly jaǵdaılar jasalǵan.

– Otandyq kásipkerlerdi qoldaý maqsatynda Qytaı tarapymen birlesken etnofestıval, Qazaqstan taýar óndirýshileriniń jármeńkesin jáne halyqaralyq qolóner sheberleriniń kórme­sin ótkizý josparlanýda. Qazir ha­lyq­aralyq ortalyqty damytý­ǵa baǵyttalǵan kóptegen jos­par men ıdeıa júzege asýda. О́tkel zaldarynda kezektiń aldyn alý úshin kelýshilerge bılet­terdi onlaın satyp alý­dyń jeńildetilgen júıesi ázirlenbekshi. Bılettiń quny bir adamǵa shamamen 3000 teńgeni quraıdy. Ortalyq ashyl­ǵannan keıin kúnine shamamen 3 myń adam qabyldaýǵa múmkindik qarastyrylǵan. Bas­qarýshy kompanııa 2023-2025 jyldarǵa arnalǵan damý strategııasyn ázirledi, – deı­di ortalyqtaǵy ınvestı­sııalar jáne marketıng departamentiniń dırektory Áset Baıǵaraev.

 Osy strategııa sheńberinde Damý tujyrymdamasy saýda-týrıstik klasterdi damytýǵa baǵyt­talady. Sondaı-aq saýda orta­lyqtary, qonaqúı, oıyn-saýyq kesheni, kórme ortalyǵy jáne sol sııaqty basqa da ınvestısııalyq jobalar kózdelgen «Qorǵas» ShYHO» AEA bas jospary naqtylanady. Investısııalyq tartymdylyqty arttyrý maq­satynda osy jobalardy iske asyrý úshin ınvestorlar tartýdy josparlap otyr.

Ashyqtyq qaǵıdatyn usta­nady jáne kelip tús­ken barlyq jobany barynsha obektıvtilikpen qarastyrady. El aýmaǵynda tura­tyn ár azamat bıylǵy 1 sáýir­den bastap ortalyqtan aıyna bir ret quny 500 eýrodan aspaıtyn 25 keli taýardy baj salyǵynsyz ákete alady. Al kórsetilgen mólsherden asqan ár keli taýar úshin 4 eýro kóleminde salyq tóleýge mindetti. Qysqasy, ortalyq saıahatshylardy qabyldaýǵa saqadaı saı.

Jetisý oblysy