Astanada «О́KM operatory» qylmystyq isi boıynsha aldyn ala tyńdaýlar ótip jatyr.
Aıyptalýshy ornynda burynǵy Ekologııa, geologııa jáne tabıǵı resýrstar vıse-mınıstri Ahmetjan Pirimqulov, «О́KM operatory» JShS basqarmasynyń burynǵy tóraǵasy Medet Qumarǵalıev, burynǵy qarjy dırektory Rýstam Temirbek jáne «О́KM operatory» kompanııasynyń burynǵy bas dırektory, Ýkraına azamaty Svetlana Korotenko otyr.
Olarǵa qomaqty mólsherdegi qarjyny qoldy qyldy degen aıyp taǵyldy.
Aldyn ala tyńdaý barysynda Korotenkonyń advokaty qylmystyq isti qosymsha tergeýge qaıtarýdy surady.
«Meniń klıentime 2016 jyldyń 18 mamyry men 2019 jyldyń 18 qarashasy aralyǵynda «О́KM operatory» bas dırektory bolǵan kezde qylmystyq jospar uıymdastyryp, Ekologııa mınıstrligi men «О́KM operatory» qyzmetkerlerin qatystyryp, olardyń arasynda qylmystyq rólderdi bólip, olarmen qylmystyq kelisimge kelip, qarajatty jymqyrǵan degen aıyp taǵylyp otyr. «О́KM operatory» JShS 2015 jylǵy 23 qarashada jalǵyz qatysýshy – quryltaıshysy bolǵan Álııa Nazarbaevanyń sheshimimen quryldy», dedi advokat.
Advokattyń ótinishi boıynsha, 17 qazandaǵy aldyn ala tyńdaý kezinde Korotenko «aqshalaı qarajatty jumsaý týraly sheshim qabyldaǵan seriktestiktiń quryltaıshysy Nazarbaevany» qylmystyq jaýapkershilikke tartý maqsatynda qosymsha tergeý úshin qylmystyq isti qaıtarý týraly ótinish bildirdi.
Eske sala ketsek, 2022 jyldyń 1 sáýirinde 13 mıllıard teńgeden asa qarjy jymqyrdy degen kúdikpen «О́KM operatory» JShS burynǵy basqarýshy dırektory ustalǵan edi.
