Aspan alaqanyndaǵy Astana

Kóktem kep, kók maısasyn tósegen be, Gúlder óleń oqyp tur kóshelerde! Jıyrma tórt jyl júregim jaıqalǵaly, Qansha kóktem qaldy eken peshenemde! – dep munan eki jyl buryn Astananyń gúlge oranǵan kóshesinde júrip, osylaı kúbirlep edim. Jyl saıyn jasanǵan sulýdaı qaryna bilezik, saýsaǵyna júzik salyp, áshekeıli sáýkelesimen boı kóterip bıikteı túsken ásem Astana kimdi bolsyn baýyryna basyp alatyny anyq. Kimdi bolsyn súısindiretini haq... Búginde beıbit kúnniń besiginde terbelip órkendep kele jatqan Astana siz ben biz kórgen juldyzdy jyldardy artqa tastady. Astanamen qurdas sábı erjetip, osy qalamen birge eseıip keledi. Biz júrgen joldar tarıhqa aınalsa, Esildiń tolqynynda taǵdyrlar qalanyp jatyr! Alǵashqyda «Astananyń sýyǵynan» seskenetin bizdiń el, aǵylyp kelip, Arqanyń jeli men lebin de jylytyp jiberdi. Kún saıyn sómkesin arqalap, aıadaı jerdi jastanyp, eńbek etip júrgen bizdiń jastar osy qalanyń erteńine eleńdeıdi. «О́z qolymyzben turǵyzyp edik» degen maqtanysh sezimin sińirip, urpaǵynyń sanasynda saqtalǵysy keledi. Qazaqqa qalatyn Astananyń qabyrǵasy túzý, eńsesi bıik, kórkem qala bolýyn Elbasy Nursultan Nazarbaevtyń ózi nazarǵa aldy. Mıllıondaǵan qara kózderdiń úmitin jaǵyp, júrekterdiń keleshekke degen senimin oıatty. Astana aspan alaqanyndaǵy qazaq jurtynyń túpki tarıhyna boılady. Rasynda, bul arǵy ata-balalarymyzdan, Kók túrikten jalǵasqan táýelsizdik tuǵyryndaı uly ıdeıa bolatyn. Dospambettiń «Saryarqanyń boıynda soǵysyp ólgen ókinbes» degeni, Aqtamberdi tolǵaýlaryndaǵy eldik ıdeıalar, Mahambettiń «Edildiń boıy en toǵaı, el qondyrsam dep edim» dep jyrǵa qosýy Nursultan Ábishulynyń jadynda jańǵyryp, aqyry aqıqat shyndyqqa aınaldy. Judyryqtaı jumylyp, birliktiń baǵasyn biletin qazaq halqynyń ulttyq qaýipsizdigi Elbasy úshin birinshi kezekte turdy. О́tpeli kezeńdegi óte qıyn asýlardan ótken soń elimizde turaqtylyq, ultaralyq kelisim men mádenı-rýhanı damý dáýiri bastalyp ketti. Bul – bizdiń úkilegen úmitimizdiń maqsatqa aınalǵany, jaqsy jetistiktermen birge aıtyla beretin shyndyǵymyz. Búginde bizdiń kóz aldymyzda ósip kele jatqan Astana Qazaqstannyń brendine aınaldy. О́reli ıdeıasymen álemniń nazaryn aýdarǵan Elbasymyz Nursultan Nazarbaev ómirlik bıik murattar jolynda búkil kúsh-jigerin jumsap keledi. Memlekettik iri jobalar buǵan dálel. Alysqa barmaı-aq, «Mádenı mura» baǵdarlamasyn alaıyqshy. Dúnıe júzinde teńdesi joq 100 tom folklor tek bizdiń qazaqta bar! Jahandaný úrdisi jańa ǵasyrdyń ­basty belgisi bolǵandyqtan, memle­ket­terdi yqpaldasyp ómir keshýge baǵyttaıdy. Sony aıqyn túsingen N.Á.Nazarbaev Shyǵys pen Batys, Eýropa men Azııa ortalyǵynda, Eýrazııa kindiginde ornalasqan Qazaq elin tek alǵa, bıikterge bastaýdyń úırenerlik úzdik úlgisin jasap berdi. Búginde Qazaqstannyń aldynda eń ozyq damyǵan 30 eldiń qataryna qosylý maqsaty tur. Mıllıondaǵan júrekterdi bir arnada toǵystyrǵan bizdiń el qashanda daladaı keńdigimen, baladaı peıilimen ózgeni ózekten tepken joq. Keregesi keń, bir shańyraqtyń astynda shalqyp ómir súrip jatqan urpaqtyń janarynda áli de jazylmaǵan jyrlardyń jalyny seziletindeı bolady maǵan... Altyn áriptermen tarıhy jazyla bastaǵan Astananyń ǵasyrlar boıy jalǵasatyn, Máńgilik elge bastaıtyn shýaqty tańdary kútip tur dep senemin... Bul mekende oryndalatyn armandar ǵana ómir súretin shyǵar... Gúl qaýyzyna úmitter túnep, eshkimniń saǵyn syndyrmaý úshin búrshik atatyn shyǵar... Keshegi kúdigimiz seıilip, atqan tańnyń nuryn táýbemen sińiretinimiz sondyqtan bolar. Táýelsizdigimizdiń boıtumaryndaı aıaýly Astana ásemdigi kún sáýlesimen sulýlana túsetin shahar bolaryna men de senemin. Árbir aýlada aıdary jelbiregen qarakóz perzentterimiz óz eliniń keleshegi úshin kúlimdep, erteńi úshin eńbek etetin alyp júrekti azamattar bolsa eken... Dınara MÁLIKOVA.