Keńes ulttyq ǵylymı júıeni basqarý isin jetildirýge, ǵylym jáne ǵylymı-tehnıkalyq qyzmet salasyndaǵy memlekettik saıasatty odan ári damytýǵa yqpal etedi. Strategııalyq mańyzdy sheshimder qabyldaýǵa oń septigin tıgizedi degen senimimiz zor.
Qazirgi dáýir – qoǵam ómiriniń barlyq salasyn qamtıtyn ózgerister kezeńi. Adamzat qoǵamynyń odan ári ósip-órkendeýinde ǵylymnyń atqaratyn orny erekshe.
Ǵylym da, bilim de ulttyń baǵa jetpes qazynasy desek, qazaq ǵylymy táýelsizdik jyldarynda ózgelermen terezesi teń bolý úshin damýdyń aıqyn jolyn tańdap keledi.
Sondyqtan qazir Memleketimizdiń basshysy Qasym-Jomart Toqaev otandyq ǵylymǵa basa nazar aýdaryp otyr. Ásirese, ýnıversıtetterdiń ǵylymı áleýetin kúsheıtýge mán berý qajet ekenin tilge tıek etip júr.
Rasynda, ǵylym men tehnologııany, ınnovasııany damytý – elimizdiń básekege qabiletin arttyratyn negizgi salanyń biri. Biz otandyq ǵylymnyń basymdyqtaryn halyqaralyq talaptarǵa jáne ulttyq múddemizge sáıkes aıqyndaýǵa tıispiz. Bul rette úzdiksiz kásibı bilim berý júıesinde ýnıversıtetterdiń orny aıryqsha. О́ıtkeni joǵarǵy bilim – ǵylym men mádenıettiń toǵysqan jeri.
Jalpy, elimizdiń ýnıversıtetteri men ǵylym salasynyń aldynda kezek kúttirmes aýqymdy mindetteri kóp.
Anyǵyn aıtý kerek, ýnıversıtetter men kásiporyndardyń arasyndaǵy baılanysty kúsheıtýge erekshe yqylas bóle bastadyq. О́ıtkeni óndiris oshaqtary men ýnıversıtettiń zerthanalary birigip jumys istep, bıznes ókilderi ǵylymǵa arqa súıep, ǵalymdarymyzdyń múmkindigin paıdalana bilgende ǵana bizdiń elimiz álemdegi irgeli memlekettermen, olardyń alpaýyt kompanııalarymen básekege túse alady.
Aldyńǵy qatarly elder ǵylymsyz, ozyq bilim men ınnovasııalyq tehnologııalarsyz memlekettiń ekonomıkasy men azamattardyń áleýmettik jaǵdaıyn túzeý múmkin emestigin jaqsy túsinip, ózderinde ǵylym salasynyń damýyna basymdyq berip, ǵalymdaryn baǵalap, olardyń jumys isteýine qolaıly jaǵdaı týǵyzyp jatyr.
Taıaýda Memleket basshysy Parlamenttiń birinshi sessııasynyń ashylýynda otandyq ekonomıkanyń damýy ǵylymnyń jetistikterine negizdelýi tıis ekenin de qadap aıtty. Ǵylymı ázirlemeler óndiriske keńinen engizilip, ekonomıkanyń ósimine yqpal etýi kerek. Bul turǵyda zertteý ýnıversıtetterine erekshe mıssııa júkteledi desek, L.N.Gýmılev atyndaǵy Eýrazııa ulttyq ýnıversıteti zertteý ýnıversıteti mártebesin alǵan-dy.
Qazirgi tańda ýnıversıtet ǵalymdary ártúrli baǵytta 200-den astam ǵylymı jobany júzege asyrdy. Bul rette biz ǵylymı-óndiristik ekojúıeni damytýǵa, naqty sektordyń iri kompanııalarymen ózekti baǵyttar boıynsha jan-jaqty yntymaqtastyqty keńeıtýge basa nazar aýdarýdamyz.
Erlan SYDYQOV,
Qazaqstan Prezıdenti janyndaǵy Ǵylym men tehnologııa máseleleri jónindegi ulttyq keńes múshesi, akademık
