1. Súıikti serıaldy óshirý
Bálkim, Ramazan aıynyń basynda-aq kógildir ekrannan bas tartýdy josparlaǵan bolarsyz. Eger ol josparyńyzda bolmasa, onda Ramazan aıynyń sońǵy on kúni – teledıdar pýltin alystaý jerge qoıyp qoıýdyń eń tıimdi kezi.
2. Internetti óshirý
Qasıetti aıdyń 21-shi kúni kelgenshe bar ýaqytymyzdy ınternette qur jibersek, naǵyz qylmys jasaǵan bolamyz. Internetten bas tarta almaıtyn bolsańyz, modemińiz, tipti uıaly telefonyńyz da pýlttiń janynan oryn tepsin.
3. Bas qosýlardy qysqartý
Ramazan aıynyń sońǵy kúnderi ońashalanýdy talap etedi. Tańnan keshke deıin meshitte otyryp qulshylyq jasaýǵa árkimniń jaǵdaıy kele bermesi anyq. Alaıda, árqaısymyzdyń bos sózden, talas-tartystan, aýyzashardan bastalyp birneshe saǵattarǵa sozylǵan kezdesýlerden, tańǵa deıin áńgime-dúken quryp otyrýdan tyıylýǵa erik-jigerimiz jetedi. Ramazan aıynyń sońǵy on kúni on túrli altyn jamby ispetti. Endeshe, bir shyny sháı úshin altyn jambydan aıyrylyp qalmaıyq.
4. Qulshylyqty arttyrý
Ramazan aıynyń aıaǵynda kópshiligimiz sharshańqyrap qalamyz. Bálkim, bul álsizdikke sebep bolǵan uıqy rejımniń buzylýy men ashtyq sezimderi bolar. Qalaı bolǵanda da, bizdiń yqylasymyz álsireıdi, biraq oǵan jol berýge bolmaıdy. Ramazan aıynyń 20-shi túninde taraýyq namazyn oqyǵan janǵa beriler syılyqty esterińizge salaıyq pa? Joq, álde 29-shy túngi saýapty aıtaıyq pa? Esińizge alar bolsańyz, jaınamaz ústinde turǵanyńyzdy ańǵarmaı da qalarsyz.
5. Úı sharýasyn jeńildetý
Bul aıdyń sońǵy kúnderindegi eń tıimsiz tirlik – úıińizge tazalyq jasaý, ıaǵnı bir qolyńyzben tóbeni áktep, bir jaqtan kilem jýý. Negizinde, úıdiń aýasyn jańartyp, úıge merekelik atmosferany Ramazan aıy kirmes buryn jasaýǵa tıispiz. Eger dál ýaqytynda jasap úlgermeı qalǵan bolsańyz, barynsha jeńilin tańdańyz: aıt kúniniń aldynda úıdi tazalap, merekelik áshekeıler ilip qoıyńyz.
6. Dúkende kezekte turmaý
Aıt kúnderi otbasymyzdy, jaqyndarymyzdy qýantýǵa asyqqandy jaqsy kóremiz. Alaıda, syılyq alamyn dep asyra silteýdiń qajeti shamaly. Oraza aıty – bul ádemi syılyq berýden jarys kúni emes, qýanyshty bólisý, mahabbatty jetkizýdiń bir joly, múmkindigi. Berekeli dastarhan, kishigirim estelik syılyqtar, jaıly atmosfera - merkeni sezinýge taptyrmas qural bolmaq.
7. Ysyrap jasaýdan bas tartý
Bul musylman áıelderge beretin taǵy bir mańyzdy keńes. Aıt kúnine eki-úsh kún qalǵanda, tipti bir apta qalǵanda azyq-túlik tizimin jasaýdy bastańyz. Bul jaqsy. Degenmen, eń bastysy aspazdyq shabytymyz sheginen shyǵyp ketpeýin qadaǵalaǵan jón.
8. Keshirim suraý
Endi jan dúnıemiz jaıly sóz qozǵaıyq. Ramazan boıy keshirim suraýym kerek, týystarmen qarym-qatynasty jaqsartý kerek, otbasylyq ómirime jylýlyqty qaıtarýym kerek dep oılap júrgen bolarsyz. Qasıetti aıdyń sońǵy on kúni osy oılardyń júzege asýyna taptyrmaıtyn sát. Ata-anańyzdan, joldasyńyzdan, aǵa-baýyr, tanystaryńyzdan, Jaratýshydan keshirim surańyz. О́zińiz de sizdi ashyq ári jasyryn túrde renjitken jandar bolsa, keshirińiz.
9. Maqsattardy júzege asyrý
Ramazan aıynyń basynda alǵa maqsat qoıǵanyńyz belgili: Quran oqýdy bastaý, nápil namazdar oqý, ýádege berik bolý, kúnde ata-anańyzǵa habarlasý jáne taǵy basqa. Ramazan aıynda maqsatyńyzǵa jetýdiń qadamyn jasamaǵan bolsańyz, qasıetti aıdyń bereketi bizdi tastap ketpeı turyp, sońǵy on kúninde bastańyz. Bir qadam jasar bolsańyz, Jaratýshy márege jetýge járdem beredi.
10. Duǵa tileý
Eń sońǵy kúnge deıin, saǵatqa, tipti mınýtqa deıin Alla Taǵaladan júregimizdi mazalaǵan ýaıymymyzdy jeńildet dep, О́zine aparar joldy kórsetýin, kúnámizdi keshirip, jaqyndarymyzdy jánnatpen súıinshileýin suraýǵa tıispiz.
