Basqa basylymdardan: Ortalyq Azııa sapary

Qazaqstan men Ázerbaıjan prezıdentteriniń shaǵyn jáne keńeıtilgen quramdaǵy kezdesýlerinde eki eldiń strategııalyq áriptestigin damytýdyń negizgi máseleleri sóz boldy.

Ilham Álıev kortejiniń Aqordaǵa kelýi jáne Memleket basshysy Qasym-Jomart Toqaevpen kezdesýi Jibek joly telearnasynyń tikeleı efırinde kórsetildi. Esterińizge sala keteıik, Ázerbaıjannyń memleket basshysy Astanaǵa Dýshanbedegi saparynan keıin baryp, «Parsy álemine túrki kópirin salýǵa» atsalysty.

Transkaspıı saýda jolynyń tıimdiligi artady

Qazaqstan prezıdenti Qasym-Jomart Toqaev pen Ázerbaıjan prezıdenti Ilham Álıev Túr­kııadan bastalyp, Ortalyq Azııa arqyly Qytaıǵa deıin sozylatyn Transkaspıı halyqaralyq kólik baǵytyndaǵy Orta dáliz jobasyn tıimdi júzege asyrý týraly kelisimge keldi.

Q.Toqaev Kaspıı teńizi arqyly kórshiles Ázer­baıjanmen Orta dálizdiń áleýetin tolyq paıdalaný mańyzdy ekenin atap ótip: «Orta dálizdi damytýdyń 2022-2027 jyldarǵa arnalǵan jol kartasyn tıimdi júzege asyrý da mańyzdy bolyp otyr. Biz ony tolyq paıdalaný jáne ınfraqurylymdy damytýǵa úshinshi elderdi tartý qajet dep kelistik», dedi.

Osylaısha, Túrkııa, Ázerbaıjan, Qazaqstan jáne Grýzııanyń syrtqy ister jáne kólik mınıstrleri Orta dálizdi damytý boıynsha 2022-2027 jol kartasyna qol qoıdy.

Toqaevtyń Álıevpen kezdesýi barysynda «taraptar saıası, saýda-ekonomıkalyq, kólik-tranzıttik jáne mádenı-gýmanıtarlyq yntymaqtastyqty nyǵaıtýǵa erekshe nazar aýdaryp, Qazaqstan-Ázer­baı­jan strategııalyq seriktestigi men odaq­tasty­ǵynyń negizgi máselelerin talqylady.

«Ázerbaıjan – biz úshin jaı ǵana mańyzdy jáne senimdi seriktes emes, baýyrlas ári jaqyn memleket. Biz kópǵasyrlyq dostyq pen ózara qoldaýdyń myzǵymas baılanystaryna súıene otyryp, búginde yntymaqtasý rýhynda damyp kele jatqan tıimdi memleketaralyq yntymaqtastyqty qurdyq», dedi Q.Toqaev.

Kelissózder qorytyndysy boıynsha Q.Toqaev pen I.Álıev birlesken málimdeme jasady. Sondaı-aq eki eldiń Joǵary memleketaralyq keńesin qurý týraly hattamaǵa jáne alty memorandýmǵa qol qoıyldy.

«Baký – Tbılısı –Jeıhan» bolashaǵy

Ázerbaıjan prezıdenti Ilham Álıevtiń Qazaq­standaǵy sapary barysynda birqatar ekonomı­ka­lyq másele talqylanyp, kelissózder júrgizildi.

Qazaqstan prezıdenti Qasym-Jomart Toqaev eki el arasynda «belsendi jáne senimdi saıası dıalog» qalyptasqanyn jáne kópjaqty platformalar aıasynda «konstrýktıvti ózara is-qımyl» úılesim tapqanyn atap ótti. Sondaı-aq Q.Toqaev: «Qazirgi kezeńdegi bas­ty mindetimiz – energetıkalyq resýrstarymyzdy álemdik naryqtarǵa tasymaldaýdy ártaraptandyrý», dep osy saladaǵy basty baǵytqa toqtaldy.

Qazaqstan bıyldan bastap munaıyn «Baký – Tbılısı – Jeıhan» qubyry arqyly tasymaldaı bastady. BTD qubyry Grýzııanyń astanasy Tbılısı arqyly Ázerbaıjannyń astanasy Baký men Túrkııanyń Jerorta teńiziniń ońtústik-shyǵys jaǵalaýyndaǵy Jeıhan portyn baılanystyratyn 1 768 shaqyrymdyq (1099 mıl) qubyr ekenin aıta ketken jón. Munaı Jeıhan portyna tasymaldanady, osy jerden álemdik naryqqa shyǵarylady.

Sondaı-aq kezdesýde Q.Toqaev pen I.Álıev eki eldiń saýda-ekonomıkalyq yntymaqtastyǵy artqanyn atap ótti. Máselen, ekijaqty taýar aına­lymynyń kólemi 40 paıyzǵa artyp, 500 mıllıo­n dollarǵa jetti. Q.Toqaev aldaǵy ýaqytta bul kór­setkishti 1 mıllıard dollarǵa deıin arttyrýǵa bolatynyn aıtty.

 Astanadaǵy Geıdar Álıev kóshesi

Astanada Ázerbaıjannyń burynǵy prezıdenti Geıdar Álıevtiń atyna kóshe berildi. Onyń ashylýyna Qazaqstan jáne Ázerbaıjan prezıdentteri qatysty.

«Elderimizdiń shynaıy dostyǵy men ózara qoldaýynyń taǵy bir aıqyn dáleli – qazaq halqynyń Ázerbaıjanǵa tartýy – Fızýlı qalasyndaǵy Qurmanǵazy atyndaǵy balalar shyǵarmashylyq ortalyǵy. Meniń oıymsha, bul mańyzdy nysan jaqyn arada jumys isteı bastaǵanynyń kýási bolamyz», dedi Q.Toqaev.

Al I.Álıev bolsa Q.Toqaevqa Astanaǵa shaqyr­ǵany úshin rızashylyǵyn bildirip, eki eldiń qarym-qatynastary, ásirese gýmanıtarlyq saladaǵy ynty­maq­tastyq arqyly nyǵaıtyp jatqanyn atap ótti.