«Qazirgi tańda Mańǵystaý oblystyq perınataldyq ortalyǵy ǵımaratynyń aldynda sábılerdi úıge shyǵarý sharasy shoýǵa aınaldy desek bolady. Kúnde saǵat 14:00-den bastap jumys aıaǵyna deıin ortalyq aldy toıdaǵydaı ý-shý, qyp qyzyl bı, qymbat kólikter, shoý baǵdarlamalar, túrli anımatorlarǵa tolyp, týma-týys, dos-jaran kishigirim toı jasaıdy. Qansha eskertsek te qarapaıym halyq ta, anımatorlar da túsiner emes. Turǵyndar jańa bosanǵan ana men ómir esigin ashqanyna bir jeti de tolmaǵan sábıge erekshe kútim men tynyshtyq kerek ekenin bile tura, baıan, dombyra, ánshilerdi, anımatorlardy jaldap, dron ushyryp, óleń aıtyp, konsert uıymdastyrýdy úırenshikti ádetke aınaldyryp otyr», delingen habarlamda.
Bul rette ortalyq qyzmetkerleri «bul - eń aldymen medısınalyq mekeme» ekenin túsindirip ótti.
«Eń aldymen, bizdiń ortalyq – medısınalyq mekeme. Munda tek qýanysh qana emes, basqa da jaǵdaılar bolyp jatady. Bir analar sábıin qushaǵyna alyp qýanyp jatsa, keıbiri jansaqtaý bóliminde ómir úshin kúresip jatady. Ásirese, óte az 500,0 -700,0 gr salmaqpen dúnıe esigin ashyp, 2-3 aı boıyna arnaıy qurylǵylarǵa qosylyp, ońaltýdan ótip jatqan sábılerge tynyshtyq asa qajet. Mýzykanyń úni daýys kúsheıtkishi arqyly qatty shyǵady jáne ol barlyq bólimderge anyq estiledi», dep jazdy Mańǵystaý oblystyq perınataldyq ortalyq.
Sondaı-aq mundaı shýly jaǵdaı medısına qyzmetkerleriniń de jumysyna kedergi keltiretini atap ótildi.
«Perzenthananyń aldynda toı-dýman uıymdastyrmaı, shyǵarýǵa 2-3 jaqyn adamdary kelip, perzenthanadan shyǵaryp alsa quba-qup bolar edi», dedi ortalyq qyzmetkerleri.
