Mamyr aıynan bastap partııanyń jastar qanaty 20 aımaqta zamanaýı jármeńkeler uıymdastyryp, azamattardyń naqty áleýmettik kartasyn qurap shyǵardy. Bul qujat jas azamattyń naqty turǵylyqty jerin, bilimin, sońǵy ýaqytta zeınetaqy qoryna qansha aýdarym jasaǵanyn, qyzyǵýshylyǵyn, sońǵy ret qandaı jumyspen aınalysqanyn jáne onyń ózge de suranystaryn qamtıdy.
«Jastardyń ózekti suraqtaryna jaýap berý – biz úshin óte mańyzdy. Máselen jumyssyzdyq máselesine baılanysty biz jyl basynda «Jastarǵa jumys» jobasyn iske qostyq. Bıyl 100 myń jasty jumyspen qamtýdy negizgi maqsat etip otyrmyz. О́ıtkeni jastar aýyldan qalaǵa kelgen kezde bazardyń tóńiregin jaǵalaıdy, taksı júrgizedi nemese jetkizip berýshi bolyp jumysqa ornalasady. Sondaı azamattardyń keı kezderi qujattary durys bolmaı jatady. Keıbireýiniń turǵylyqty mekenjaıy joq bolyp shyǵady. Jalpy, munda qarapaıym qaǵazdan bastap, sotqa deıingi máseleler kóptep kezdesedi. Áleýmettik karta – osynyń bárin aıqyn kórsetetin qujat. Birinshiden, esigimiz jumyssyz jastarǵa árdaıym ashyq, biz olardan habarlama kútemiz. Ekinshiden, óńirlerdegi máslıhat depýtattaryna jol kartasy aıasynda jergilikti ákimdiktermen birlesip, áleýmettik kartany ázirleýdi tapsyryp jatyrmyz», dedi N.Jetpisbaev.
Osylaısha, jastar qanaty aýdandardaǵy eki qolǵa bir kúrek tappaı sendelgen jastardy qyzmetke ornalastyrýdy kózdep otyr. Buǵan deıin olar «Sátti qadam», «Jastar kadrlyq rezervi» syndy birqatar jobany iske asyrǵan edi.
«О́zin-ózi jumyspen qamtyǵandardy qosa eseptegende, jastar arasyndaǵy jumyssyzdyq 10 paıyzǵa deıin jetken. Jalpy árıne, 100 myń degen bul kóp emes, degenmen de bul bizdiń alǵashqy qadamdarymyzdyń biri. 100 myń jumys orny túrli mamandyqty qamtıdy. Qazirdiń ózinde taý-ken óndirisi boıynsha 2 myń jumys ornyn jumysshylarmen qamtamasyz etý boıynsha kelisimder júrgizdik. Sondaı-aq qazir «Samǵaý» degen joba qosylyp jatyr. Bul joba Eńbek jáne halyqty áleýmettik qorǵaý mınıstrligimen birlesip jasalǵan. Baǵdarlama jas mamanǵa Ulttyq kompanııalarda, iri bıznes kompanııalarda taǵylymdamadan ótip, jumysqa ornalasý múmkindigin berýdi kózdeıdi. Osyǵan qosa 2,5 paıyzdyq nesıe berý arqyly 1-2 jasty jumyspen qamtý máselesi de qolǵa alynady», dedi «Jastar rýhy» jastar qanatynyń tóraǵasy.
