Á.Qýantyrov óz sózinde atap ótkendeı, Qazaqstan men amerıkalyq iri kompanııalardyń yntymaqtastyǵy 30 jyl boıy jalǵasyp keledi jáne olardyń sany jyl saıyn ósip jatyr.
QR men AQSh arasyndaǵy taýar aınalymy 2022 jyly pandemııaǵa deıingi deńgeıden asyp, $3,1 mlrd. qurady, bul ótken jylmen salystyrǵanda 37%-ǵa artyq. Qazaqstannan AQSh-qa eksport 32% - ǵa ósip, $1,2 mlrd qurady, bul rette amerıkalyq taýarlardyń ımporty 40% - ǵa ulǵaıyp, $1,9 mlrd qurady.
«QR Úkimetiniń qolaıly ınvestısııalyq jaǵdaı jasaý boıynsha júrgizip jatqan ekonomıkalyq reformalarynyń nátıjesinde Qazaqstandaǵy amerıkalyq ınvestısııalar men kompanııalardyń sany bir jylda 9%-ǵa ósti», dedi UEM basshysy.
Sondaı-aq mınıstr elimizde júrgizilip jatqan salyq-bıýdjet saıasaty, bıznes-klımatty jaqsartý boıynsha reformalar týraly aıtyp berdi jáne ınvestorlardy aǵymdaǵy jyldyń 8-9 maýsymynda ótetin Astana halyqaralyq forýmyna qatysýǵa shaqyrdy. Osy ýaqytta AQSh-tyń Saýda mıssııasynyń Qazaqstanǵa kelýi kútilýde.
Sonymen qatar, Á.Qýantyrov Citigroup bankiniń úkimetter men memlekettik sektor jónindegi jahandyq blogynyń basshysy Djýlı Monakomen kezdesti. Taraptar álemdik ekonomıkanyń ózekti máselelerin, qarjy naryǵyndaǵy negizgi úrdisterdi, sondaı-aq bank sektoryndaǵy problemalardy talqylady. D.Monako hanym banktiń qarjylyq kórsetkishterimen bólisip, damý strategııasy týraly aıtty.
Kezdesý qorytyndysy boıynsha Djýlı Monako Astana halyqaralyq forýmyna qatysýǵa jáne Qazaqstan Úkimetimen yntymaqtastyqty jalǵastyrýǵa múddeliligin bildirdi.
