Qazaqstan dzıýdo federasııasynyń baspasóz qyzmeti málim etkendeı, qazirgi tańda ulttyq qurama sportshylary álem chempıonaty aldyndaǵy qorytyndy oqý-jattyǵý jıynyna qatysyp jatyr. Qazaqstan erler quramasynyń bas bapkeri Nurbol Súleımenov sportshylardyń álem chempıonatyna qalaı iriktelgeni týraly aıtty.
«Álem chempıonaty – maýsymnyń eń mańyzdy jarystarynyń biri. Bizdiń mindetimiz osy jarysqa barynsha daıyndalyp, sportshylardy jaqsy formaǵa keltirý boldy. Álem birinshiligine sportshylar ár salmaq boıynsha osy maýsymdaǵy kórsetkishterine qaraı irikteldi. Qurama sportshylary jyl bastalǵannan beri birneshe Gran Prı, Grand Slam jarysyna qatysty jáne qurama sortshylary jyl basynan barlyq jarysta júldegerler qatarynan kórindi. Osyndaı nátıjege qaraı bapkerler quramy álem chempıonatyna qatysatyn quramany jasaqtady. Nátıjesinde, Doha tatamıinde el namysyn aǵa býyn ókilderi de, jas dzıýdoshylar da qorǵaıtyn bolady.
Qazir biz Almaty oblysyndaǵy olımpıadalyq daıarlaý ortalyǵynda jattyǵýdyń sońǵy kezeńderin ótkizip jatyrmyz. Munda biz kúsh kórsetkishteri boıynsha, tehnıka men taktıka boıynsha kóp jumysty jetildiremiz. Álem chempıonaty jyldyń eń mańyzdy dodasy bolǵanymen, odan keıin bizdi Astanada ótetin Grand Slam jarysy kútip tur. О́z jerimizde ótetin álemdik básekede jaqsy nátıjege qol jetkizý úshin bizge álem chempıonatynan jaraqatsyz, abyroımen oralý asa mańyzdy», deıdi Qazaqstan erler quramassynyń bas bapkeri Nurbol Súleımenov.
Dohada ótetin dzıýdodan erler men áıelder arasyndaǵy álem chempıonatyna qatysatyn Qazaqstan quramasynyń tizimi kelesideı:
Erler:
60 keli: Eldos Smetov, Nurqanat Serikbaev
66 keli: Ǵusman Qyrǵyzbaev
73 keli: Jansaı Smaǵulov, Danııar Shamshaev
81 keli: Abylaıhan Jubanazar
90 keli: Dıdar Hamza, Aıdar Arapov (mix team)
100 keli: Nurlyhan Sharhan
100 keliden joǵary salmaq dárejesi: Ǵalymjan Qyryqbaı
Áıelder:
48 keli: Abıba Ábýjaqynova, Ǵalııa Tynbaeva
52 keli: Tolǵanaı Ábeýova
57 keli: Baqyt Qusaqbaeva
63 keli: Esmıgýl Kýıýlova
70 keli: Anastasııa Maıakova
78 keli: Arýna Jangeldına
78 keliden joǵary salmaq dárejesi: Kamıla Berliqash, Aqerke Ramazanova
Aıta keterligi, Dohada ótetin álem chempıonaty Parıj Olımpıadasy aldyndaǵy sońǵy álem birinshiligi bolyp sanalady. Jarys nátıjesi boıynsha sportshylardyń álem jáne Olımpıada reıtıngterine tıisti upaılar úlestiriledi. Atap aıtqanda, álem chempıony – 2000, kúmis júldeger – 1400, al qola júldeger 1000 upaıdan enshileıdi.
