Memleket basshysynyń tóraǵalyǵymen ótip jatqan elimizdiń áleýmettik-ekonomıkalyq damýy jónindegi keńeste baǵany turaqtandyrý Úkimettiń jáne jergilikti atqarýshy organdardyń asa mańyzdy mindetteriniń biri ekeni basa aıtyldy. Osyǵan baılanysty Úkimet pen Ulttyq bank birlesip ınflıasııany baqylaý jáne tómendetý boıynsha sharalar keshenin iske asyryp jatyr. Nátıjesinde bıylǵy naýryz aıynda jyldyq ınflıasııa 18,1%-ǵa deıin baıaýlady. Sońǵy 4 aptada áleýmettik mańyzy bar azyq-túlik taýarlary boıynsha ınflıasııa tirkelgen joq.
«Bizdiń aldymyzda bıyl ınflıasııany 2 esege deıin tómendetý mindeti tur», dedi Álıhan Smaıylov.
Respýblıkada Halyqtyń tabysyn arttyrý baǵdarlamasy iske asyrylý ústinde. Osy is-sharalar aıasynda bıyl 3 mln-nan astam adamnyń jalaqysy ósti.
Memlekettiń barlyq áleýmettik mindettemeleri ýaqtyly jáne tolyq kólemde oryndalyp keledi. Atap aıtqanda, bıyldan bastap 4,4 mln adamdy joǵarylatylǵan áleýmettik tólemdermen qamtýǵa 4,6 trln teńge bólindi. Ulttyq jobalardy iske asyrý, jańa óndirister ashý, shaǵyn jáne orta bıznesti damytý, jańa jumys oryndaryn qurý esebinen 1 mln-ǵa jýyq adam jumyspen qamtylady.
