Álem quramasy úzdik shyqty

Buǵan deıin jaz­ǵa­ny­myz­daı, rapıd boıynsha ótken alǵashqy eki kúnde otandas­tarymyz álem quramasyna bes upaı aıyr­mashylyǵymen jol bergen edi. Alǵashqy tórt týrda áıelder arasyndaǵy álem­­dik reıtıngte kósh bas­tap turǵan qytaılyq Hoý Ifan bas­taǵan shahmatshylar 18,5:13,5 esebimen alǵa shyǵyp al­sa, keıingi kúngi básekede de qarqynyn báseńdetken joq. Bıbisara Asaýbaeva, Dı­nara Sádýaqasova, Jansaıa Ábdi­málik sekildi tájirıbeli gross­meısterlerimiz qar­sy­las­t­a­ry­na laıyqty qar­sylyq kór­­setkenimen, jas shahmatshylarymyz jer-jahannyń úz­dikteri aldynda tájirıbesiz­digin tanytty. Sóıtip ekinshi kúngi tórt týrdan keıin, ıaǵnı jalpy segiz týrdyń qory­tyndysy boıynsha Dana Reıznıese-Ozola jetekshilik etken álem quramasy 34,5-29,5 esebimen jeńiske jetti.

Bir aıta keterligi, sol eki kúnde jyldam shahmattan (blıs) álemniń eki dúrkin jeń­im­pazy Bıbisara Asaýbaeva tórt dúrkin álem chempıony 29 jastaǵy qytaılyq Hoý Ifandi eki ret tize búktirip, týr­nırdi tamashalaýǵa kelgen ma­mandar men jankúıerlerdiń nazaryn ózine aýdartty.

Jerlesterimiz rapıd jarysy boıynsha qarsylastaryna jol bergennen keıin jan­kúıerler blıs básekesinde otan­dastarymyzdan nátıjeli oıyn kútken bolatyn. О́ıtkeni keıingi jyldary Qazaqstan shahmatshylary jyldam shahmatta tolaıym tabystarǵa qol jetkizip júr. Degenmen, bul saıysta da Qazaqstan qu­ra­­ma­synyń oıynshylary qar­sylastarynan jeńilip qaldy.

Blıs boıynsha álemniń eń úzdik shahmatshysy sanalǵan Bıbisara Asaýbaeva segiz match­tyń tórteýinde jeńiske jetip, Qazaqstan quramasyn jalpy esepte alǵa súırese de, ózge árip­testeri oǵan kómektese al­mady. Hoý Ifandi rapıdte eki márte jeńgen Bıbisara bul joly sol jetistigin qaıtalaı almady. Blıste ol qytaılyq qarsylasynan bir márte basym túsip, bir ret jeńilip qal­dy. Al Dınara Sádýaqasova (úsh teń oıyn) men Jansaıa Áb­di­málik (tórt teń oıyn) bir­de-bir kezdesýinde jeńiske jete al­mady.

Sóıtip 8 týrdyń qory­tyn­­dysy boıynsha álem qura­masy bul joly da jerles­terimizdi aıqyn basymdyqpen qapy qaldyrdy – 38,5-25,5. Erejege sáıkes, jeńimpaz atan­ǵan quramaǵa ýáde etilgen 30 000 AQSh dollary, ekin­shi orynǵa 20 000 dollar kó­lemindegi qar­jylaı syıaqy be­rildi.

О́z elimizde uıymdasty­ryl­ǵan jarysta otandasta­rymyz jankúıerlerin jeńis­pen qýanta almasa da, kórer­menderge tartysty oıyn syı­­­laı bildi. Sonymen qa­tar jas shahmatshylarymyz álem­niń eń úzdikterimen she­ber­lik baıqasyp, ózderine ómir­lik azyq bolatyn mol tá­ji­rıbe jınady. Sondyqtan bul match­ta eldiń shahmaty da, shahmatshylary da jeńilgen joq degen oıdamyz.