Depýtat medısınalyq saqtandyrý máselelerine toqtalyp, usynys bildirdi.
«Qazir azamattar aýrýhanaǵa baryp, tekseristen tegin ótemin dese, bir aı nemese úsh aı kútý kerek. Al eger sol adamdar sol tekseristen aqyly túrde ótemin dese, dál sol ýaqytta ótýine bolady. Sondyqtan eriksiz aqyly qyzmetti alýǵa májbúr bolady. Onda biz ne úshin aı saıyn jalaqydan jarnany tóleımiz deıdi. Bul negizinen jasandy problema. Ol engizilgen qarjylandyrý júıesimen de baılanysty bolyp tur. Mysaly, emhanalar is júzinde aı saıyn kvota arqyly qarajat alady. Osyny eskere otyryp aı saıynǵy qarjylandyrýdan bas tartý kerek. Kórsetilgen qyzmet faktisi boıynsha tólenýi tıis. Pasıentterge medısınalyq uıymdy tańdaý erkin berip túsinispeýshilikti boldyrmaý úshin tegin medısınalyq kómektiń kepildendirilgen kólemi men medısına saqtandyrý paketterin naqtylaýdy usynamyn», dedi Ashat Aımaǵambetov.
Depýtat dárigerlerge artylǵan júktemeniń kóptigin de aıtty. Dárigerler emdelýshilerdiń aldyndaǵy mindetine emes, toltyrylýy kerek qujattarǵa kóp ýaqyt jumsaıdy dedi depýtat. Sondyqtan bundaı jumystardy medbıkelerge tapsyrýdy usyndy.
«Búgingi tańda dárigerler pasıentterdi tekserýdiń ornyna kompıýterge telmirip, derekterdi túrli aqparattyq júıelerge engizýge májbúr bolǵandyqtan naýqastardy qaraýǵa tipti, ýaqyty da joq. Sondyqtan barlyq qujattardy toltyrýdy medbıkelerge tapsyrý qajet dep sanaımyn. Shtat sanyn kóbeıtý arqyly dárigerlerdiń júktemesin azaıtý qajet jáne biryńǵaı aqparattyq júıeni iske qosý boıynsha jumysty shuǵyl aıaqtaý kerek», dep qosty depýtat.
