Júlde qory 780 637 dollarǵa baǵalanǵan dodanyń alǵashqy aınalymynda osy jarystyń altynshy raketkasy retinde tirkelgen E.Rybakına dúnıejúzilik reıtıngte 65-orynda turǵan germanııalyq Iýle Nımaıermen sheberlik baıqasty. Bir jarym saǵatqa jalǵasqan matchta otandasymyz qarsylasyn eki sette – 7:5, 6:3 esebimen tize búktirip, ekinshi aınalymǵa joldama aldy. Báseke barysynda otandasymyz 9 eıs jasap, 5 breık-poınttyń úsheýin tıimdi paıdalana bildi. Elena týrnırdiń shırek fınalyna shyǵý úshin álemniń 14-raketkasy brazılııalyq Beatrıs Haddad Maııamen talasady.
Týrnırdiń jeńimpazyna 120 myń eýro men «Porshe» sportkary syıaqyǵa qosymsha retinde ıelik etetinin aıta keteıik. Al Shtýtgarttaǵy týrnırdiń byltyrǵy básekesinde E.Rybakına ekinshi aınalymda súringen bolatyn. Ol 1/8 fınalda ıspanııalyq Paýla Badosa Hıbertpen kezdesip, úsh sette 6:4, 4:6, 7:6 esebimen jeńilip qalǵan edi.
