Sabaq bastalar aldynda stýdentterimen birge Ánurandy naqyshyna keltirip aıtatyny da kóńilge jylylyq uıalatty. Sabaq arasynda stýdentterin sergitip alý úshin Abaıdyń «Kózimniń qarasy», Shámshi Qaldaıaqovtyń «Anashym» ánderin til úırenýshilermen birge shyrqaıdy.
Onyń esimi – Alına Kan. О́zi aıtqandaı, ulty nemis bolsa da, qazir áleýmettik jeli arqyly qazaq tilin keńinen nasıhattap júrgen ózge ult ókili. Onyń onlaın sabaqtaryn mıllıondaǵan adam kóredi. Almaty oblysyna qarasty Baqanas eldi mekeniniń týmasy Alına qazaq tili kýrsynda tegin sabaq beredi. Aldyǵa qoıǵan maqsaty týraly suraǵanymyzda ol: «Men elimizdegi ár azamat qazaq tilin jetik meńgerse eken deımin. Osy arqyly qazaq tilin urpaqtan-urpaqqa jalǵastyrýǵa úlesimdi qosqym keledi, sol úshin de bar ýaqytymdy qıyp, kýrsta tegin sabaq berip kelemin», dedi.
Balalyq shaǵy Baqanasta ótken Alına kórshi qazaq balalarymen birge oınap júrip, qazaq tilin jaqsy meńgerip alǵan. Tipti onyń maqal-mátelderdi de, turaqty sóz tirkesterin de óz ornymen qoldanatyny súısindirdi. Jumystan sharshaǵanda qazaqsha kórkem ádebıetterdi oqyp demalatynyn da jasyrmady. «Sizge unaǵan qazaqsha kitaptar qaısy?» degen suraqqa ol: «Árıne, «Abaı joly», dep erkin jaýap berdi. Sóıtsek, keıipkerimiz mektepte júrgende-aq «Abaı jolyn» oqyp, ana tilimizdi erkin meńgerýge jol izdepti. «Qazaq mádenıetine, ádebıetine, tipti salt-dástúrge qatysty barlyq qundylyqtardy bilgisi keletinder bolsa, eń aldymen «Abaı jolyn» oqýy kerek. Men solaı istedim, ózim osy shyǵarmadan qazaqtyń nebir kórkem sózderin úırendim. Bir halyqtyń tutas ómirin baıan etetin kórkem shyǵarmany janym, rýhym qazaq deıtinder sózsiz oqýǵa mindetti», deıdi ol. Onyń áleýmettik jelidegi paraqshasynan Muqaǵalı Maqataevtyń «Eń birinshi baqytym – halqym meniń» dep bastalatyn óleńin oqyp, jerlesterimizge Otandy súıý, patrıot bolý týraly jalyndy sálem joldaǵanyn kórip, tipti marqaıdyq.
Tehnologııalyq baǵytta bilim alsa da Alına Kannyń memlekettik tildi nasıhattaý jolyna shyndap kiriskeni anyq baıqalady. Osy maqsatta ol «Til qozǵalysy» jobasyna qatysyp, qazaq tilin úırenýshilermen bilgenin bólisýge, olardyń tezirek til syndyrýyna nıettengen. Qazir Alına Kan jumys isteıtin «Sóıle» klýby Qazaqstannyń 12 qalasynda bar. Keıipkerimiz Almaty qalasyndaǵy klýbta sabaq beredi. Bul kýrstyń basty maqsaty – memlekettik tilde sóılesýdi úıretý, qazaq tiliniń aıasyn keńeıtý. «Men úshin «Til tutastyǵy – el tutastyǵy» degen máteldiń mańyzy zor. Al meniń jeke maqsatym – árbir til úırenýshige óz eline, jannat jerine, tuǵyrly tiline degen mahabbatty oıatý. Kóptegen azamattyń óz tilin bilmeıtini shyndyq, men osy oraıda olarǵa óz tilińizdi úırenip, qoǵamǵa úles qosyńyz degim keledi».
Árbir adam balasy úshin sheksiz baqyt ekeý bolsa, sonyń biri – Otan, al ekinshisi, taǵy da – Otan. Bizdiń keıipkerimiz de ózi týyp-ósken, dámin tatyp, sýyn ishken atamekenin kórkeıtýge, sonyń bolashaǵy úshin úles qosýǵa nıetti ekenin óz is-áreketimen dáleldep keledi. Biz úshin el – bir, til – bir, maqsat-múdde de – bir. Qaǵynan jeringen qulandaı bolǵan keı otandasymyzdyń óz tiline muryn shúıiretin kisápirligine qarap, Alınadaı aıtýly qyzdarǵa alǵys aıtqymyz-aq keledi.
