Almaty qalalyq densaýlyq saqtaý basqarmasy jaqynda qaladaǵy barlyq buqaralyq aqparat quraldarynyń qyzmetkerlerin medısınalyq tekserýden ótkizýge jaǵdaı jasap, ashyq esik kúnin ótkizdi.
Kúndelikti qarbalas jumyspen qaýyrt júretin jýrnalıster qaýymynyń óz densaýlyǵyna qarap, kóńil bólýine ýaqyttary bola bermeıtini ras. Barlyq bilikti kásibı mamandy bir emhanaǵa jınap, osyndaı janashyrlyq, qamqorlyq kórsetip jatqan kezde múmkindikti paıdalanǵysy kelgen jýrnalısterdiń bul usynysty qup alyp, kelýshilerdiń qarasy kóbeıýi bul da bir bitken is bolǵanyn kórsetkendeı.
BAQ ókilderin Almaly aýdanyna qarasty №5 qalalyq emhana aldynda Almaty qalasy densaýlyq saqtaý basqarmasy ákimshilik bóliminiń basshysy, baspasóz hatshysy, jýrnalısterdiń dosy Láıla Keńesbaeva men emhananyń bas dárigeri Gúlshahıra Qambarova kútip alyp, qoldaryna tekserýden ótetin mamandardyń tizimi men bir-bir medbıkeni qosyp berip, qoshemettiń astynda qaldyrdy. Aıta keteıin, osy joldardyń avtory da tekserýden ótti.
– Qaladaǵy jýrnalıster qaýymyna osyndaı qyzmet kórsetý ıdeıasyn medıkterdiń kásibı merekesine oraı Almaty qalasy ákiminiń orynbasary Záýresh Amanjolova aıtqan edi. Basqarma buǵan deıin de ashyq esik kúnderin ótkizýdi dástúrge aınaldyrǵan. Biraq bul joly Záýresh Jumanáliqyzynyń bastamasyn qoldap, tek jýrnalısterge arnap, búkil qala boıynsha jetekshi kafedraldy mamandardy shaqyryp, aksııa ótkizýdi jón dep uıǵardyq. Eki kúnde Almatydaǵy júzge jýyq BAQ ókilderi salalyq mamandardan, dıagnostıkalyq tekserýden ótti. Ras, jýrnalısterdiń óz densaýlyǵyna kóńil bólýge ýaqyty da, múmkindikteri de bola bermeıtinin jaqsy bilemiz. Sondyqtan densaýlyqqa jaýapkershilikpen qaraý maqsatynda osyndaı medısınalyq keńes, kómek kórsetetin amal taptyq, – dedi bizge qalalyq densaýlyq saqtaý basqarmasynyń basshysy, medısına ǵylymdarynyń kandıdaty Janat Qasymjanova.
Shynynda da, №7 klınıkalyq aýrýhananyń endokrınologııa bóliminiń meńgerýshisi Aınur Asanova, qalalyq Kardıologııa ortalyǵynyń kardıolog-dárigeri Merýert Opabekova, №5 emhananyń bilikti mamandary – ÝDZ-diń dárigeri B.Mámbetova, psıholog S.Shákirjanova, revmatolog A.Athanova, gastroenterolog B.Jubanyshbekova, t.b. mamandardyń aldynan ótip, birqatar laboratorııalyq zertteý jasaldy.
Atalmysh emhananyń áıelder keńesiniń meńgerýshisi Gúlmıra Ánýarbekqyzy Avkýbaevaǵa jolyǵyp, eki kún boıy ótkizilgen aksııanyń qorytyndysyn suraǵanymyzda, alǵashqy kúni – 10, ekinshi kúni 30 adam qabyldaǵanyn, olardyń arasynan bir pasıentti aýrýynyń asqynýyna baılanysty Jedel járdemmen aýrýhanaǵa jibergenin, 2 áıelden jatyr mıomasy anyqtalǵanyn, sýyq tıgen birneshe pasıentke em-domyn jazyp bergenin, eń bastysy, barlyq qabyldaýǵa kelýshilerden onkomazok alynyp, onyń qorytyndysy on kúnnen keıin belgili bolatynyn jetkizdi. Al júrekti EKG-ge túsirip, birden kardıogrammasyn oqyp, keńes bergen Almaty qalalyq kardıologııa ortalyǵynyń dárigeri Merýert Opabekova birinshi kúni 21, kelesi kúni saǵat úshke deıin 49 adam qabyldaǵan. 2 adamda qan qysymy joǵary, 2 adamda ıshemııalyq júrek aýrýy, bir jas jigittiń kardıogrammasynda úlken ózgeris baryn, oǵan júregine ÝDZ-den ótýdi usynǵanyn aıtty.
«Bıyl Respýblıka alańynda Qarttar jylyna oraı dál osyndaı aksııa uıymdastyrylǵan edi, – dedi bizge №7 qalalyq klınıkalyq aýrýhanadan kelgen nefrologııa bóliminiń meńgerýshisi, bilikti maman, joǵary sanattaǵy dáriger Shynar Sársenova. – Mynaý bıylǵy jylǵa ekinshi is-shara. Menińshe, búgingi aksııa erekshe ótýde. Tańdalǵan ǵımarat ta keremet, dárigerlerge, jýrnalısterge de barlyq jaǵdaı qarastyrylǵan. Respýblıka alańy aldynda dárigerler de, kelýshiler de tońyp, mazamyz ketip, ábigerge túsken edik. Al búgingi aksııanyń qorytyndysyna kelsek, qabyldaýda bolǵan názik jandylardyń 70 paıyzynda mastopatııa, ıaǵnı omyraýynda kinárat bar. Olardyń deni ózderinde mundaı patologııanyń baryn bilmegen. 2 adamda qan qysymynyń joǵary ekeni anyqtaldy. Olar ony bilmegen. Qazirgideı aptap ystyqta bir jerde qulap qalsa qaıtedi. Mundaı aksııanyń jaqsylyǵy – adamǵa aýrý belgisin tapqannyń ózi kómek emes pe. Maǵan unaǵany, topyrlaǵan kezek joq, bári mádenıetti túrde ótýde. Onyń ústine, bir-birlerińizdi bilesizder, qandaı tamasha».
Iá, shynynda keremet syı boldy. Bas aýyryp, baltyr syzdasa da ýaqytynda qaralmaı, keıinge qaldyryp júretin ádetimizdiń baryn joqqa shyǵarmaımyz. Onyń ústine ózimizge ózimiz dıagnoz qoıyp alyp, kúdiktenip júretinimiz taǵy bar. Qalaı degende, aınaldyrǵan 4-5 saǵattyń ishinde 16 mamannyń aldynan medısınalyq aldyn ala tekserýden ótip, bar máselemiz sheshilgendeı jeńildep qalǵanymyz ras.
– Omyraýym anda-sanda shanshyp qoıatyn. О́zimizdiń ýchaskelik terapevt mammolog-dárigerge barýǵa keńes bergen-di. Sodan áni-mine dep júrgenmin. Onyń ústine emhanada ÝDZ-ge tegin túsýge aldyn ala kezekke jazylyp, ony kútýiń kerek. Bul joly ÝDZ-ge de, mammolog dárigerge de qaralyp, kóńilim ornyna tústi. Ári qan qysymyn, qandaǵy qanttyń, holesterınniń mólsherin bildim. Basqa da birqatar mamandardan ótip, qajetti keńes aldym. Osyndaı sharany uıymdastyrǵan qalalyq densaýlyq saqtaý basqarmasyna rahmetten basqa aıtarymyz joq, – deıdi «Egemenniń» Shynary.
Mundaı jaǵymdy pikirlerdi medısınalyq tekserýden ótýge basqa basylym, telearnalardan kelgen áriptesterimizden de estidik. Taǵy bir keremeti, emhanada kópten kórmegen qalamdastarymyzdy kórip, máre-sáre bolyp qaldyq.
Aksııa sońynda jýrnalısterge osyndaı jaǵdaı jasaǵan №5 qalalyq emhananyń bas dárigeri, Densaýlyq saqtaý isiniń úzdigi, joǵary sanattaǵy dáriger Gúlshahıra Qambarovaǵa rahmetimizdi aıtyp, zor rızashylyǵymyzdy bildirdik.
Gúlzeınep SÁDIRQYZY,
«Egemen Qazaqstan».
Almaty.
