14-22 sáýir aralyǵynda ótken alamanǵa 7-17 jas aralyǵyndaǵy 500-den astam álemniń eń tańdaýly shahmat sheberleri qatysty. Bul básekede Qazaqstan ulttyq quramasynyń músheleri júlde sany jaǵynan aldyna jan salǵan joq. Máselen, G09 (9 jasqa deıingi oıynshylar) arasynda klassıkalyq shahmattan Alanna Berikqyzy tabysty nátıje kórsetip, altyn tuǵyrdan qol bulǵady. Ol shveısarııalyq júıe boıynsha uıymdastyrylǵan 9 partııanyń segizinde jeńis toıyn toılady. Otandasymyz sheshýshi matchta osy dodadaǵy óziniń negizgi qarsylasy mońǵolııalyq Selmýýn Iderden (8 upaı) basym túsip, jarys jeńimpazy atandy. Jalpy, bul jas sanatynda 41 oıynshy synǵa túskenin aıta ketken jón. Otandasymyz osy jeńisiniń arqasynda G09 sanaty boıynsha FIDE reıtınginde 1-orynǵa kóterildi.
Sonymen qatar 17 jasqa deıingi shahmatshylar arasyndaǵy dodada synǵa túsken taǵy bir otandasymyz – Ámına Qaıyrbekova da Grekııadaǵy álem chempıonatynda altynnan alqa taqty. Ol báseke barysynda 8 kezdesýde jeńiske jetip, óziniń eń basty qarsylasy – túrkııalyq Zeınep Chıftındi (7,5 upaı) basyp ozdy.
Sondaı-aq Grekııadaǵy álemdik jarysta Nuráli Nurshın (U07 jas sanaty, 7,5 upaı) men Aısultan Bısalıev (U09, 7) bas júldege synyq súıem jetpeı, kúmis medal oljalasa, Rızat Ulan (U07, 7 upaı), Álimjan Jaýynbaı (U09, 7), Danıs Qýandyquly (U11, 6,5), Edgar Mamedov (U13, 7) jáne Dalııa Dıasqyzy (G11, 6,5) qola júldeger atandy.
Mektep oqýshylary arasyndaǵy jahandyq dodanyń qorytyndysy boıynsha, joǵaryda aıtqanymyzdaı, jerlesterimiz jalpykomandalyq esepte top jarsa, keıingi oryndarǵa Túrkııa (3 altyn, 2 kúmis, 2 qola) jáne Mońǵolııa (2 altyn, 3 kúmis, 1 qola) shahmatshylary jaıǵasty.
