10-partııada aq tastardyń qojaıyny Dın Lıjen óz júrisin senimdi bastady. Qytaılyq grossmeıster bul joly da «tórt atpen» aǵylshyndyq júristi tańdady. Shahmatshylar matchtyń 14-shi júrisine deıin 2020 jyly Nepomnıashıı – Kardozo arasynda ótken tartysty básekeniń (sol kezdesýde Iаn jeńiske jetken bolatyn) qadamdaryn qaıtalap otyrdy. Nepomnıashıı 14-shi júriske kelgende h4 júrisin jasap, oıyn barysyn basqa arnaǵa buryp jiberdi. Bul kezde de eki oıynshynyń pozısııasy teń dárejede tursa da, aq tastardyń patshasy qaýipsiz aımaqta edi. Sondyqtan Dınde báribir belgili bir deńgeıde basymdyq boldy.
Biraq ári qaraıǵy iz kesý júristerinde Lıjen óz múmkindigin paıdalana almaı, shahmatshylar 45 júristen keıin bir-biriniń qolyn alyp, teń nátıjege kelisti. 10-partııa úsh saǵattan asa ýaqyt oınaldy.
Al bir kúnnen keıingi 11-partııada Nepomnıashıı aq tastarmen oınap, ázirshe ózine tıimdi bolyp turǵan teń nátıjege qol jetkizdi. Degenmen 15 júriske deıin reseılik shahmatshy birneshe pozısııada jaqsy múmkindikterge ıe bolyp turǵan-dy. Básekeni júrgizip otyrǵan shahmattan 15-shi álem chempıony úndistandyq Vıshı Anand ta Iаnnyń pozısııasyn joǵary baǵalap, «endi oǵan ári qaraı oınaý jeńil bolady», degen edi. Alaıda Nepomnıashıı keıingi júristerinde bul basymdyǵyn paıdalana almady. Kezdesýdiń 39-shy júrisine kelgende eki shahmatshy da teń nátıjege razy ekendikterin bildirip, partııany jalǵastyrýdan bas tartty. Bir qyzyǵy, 11-partııada álem chempıony ataǵynan úmitkerler nebári eki-aq saǵat oınady. Bul – bıylǵy álem chempıonatyndaǵy eń jyldam oınalǵan partııa jáne birinshiliktegi qatarynan tórtinshi, al jalpy altynshy teń nátıje boldy.
Álemniń eń úzdik shahmatshylary arasyndaǵy jahandyq doda kún ótken saıyn óz máresine taıap kele jatqan soń sońǵy partııalarda teń nátıje jıi tirkelip jatatyny zańdylyq. О́ıtkeni bul kezeńdegi árbir júristi tájirıbeli grossmeıster «jeti ret oılanyp, bir ret jasamasa», aqyr sońynda opyq jep qalýy ábden múmkin. Sondyqtan olar sońǵy partııalarda asa kóp táýekelderge bara qoımaıdy. Ásirese esepte alda kele jatqan reseılik shahmatshy. Oǵan qazir teń nátıjeniń ózi de jeńispen para-par. Al Dın Lıjen álemniń shahmat tájin óz eline alyp ketkisi kelse, endi sońǵy úsh oıynda baryn salyp, jeńiske jetýi kerek. Áıtpese, báseke taǵdyry Nepomnıashııdiń paıdasyna sheshiletini anyq.
