Taqyryptaǵy birlik, turaqtylyq, damý sózderi el úshin eń mańyzdy memleket quraýshy qaǵıda bolyp sanalady. Al birlik sózi qazaq halqy úshin ǵasyrlar qoınaýynan kele jatqan qasıetti sózge aınaldy desek, artyq aıtqandyq bolmas. QHA ókilderi tek qoǵamdyq deńgeıde ǵana emes, memlekettik basqarý, zań shyǵarýshy organdardyń quramyna enip, Assambleıany saıası reformalardy júzege asyrýda belsendi qatysatyn biregeı ınstıtýt retinde mańyzyn arttyra tústi.
Bıyl qazaq tiliniń memlekettik til mártebesin alǵanynan 35 jyl tolady. Qazaq tiliniń qoǵamdaǵy rólin arttyrý, bılik pen is-qaǵazdar tiline aınaldyrý baǵytynda qyrýar is-shara atqaryldy. Degenmen qazaq tiliniń jalpyqazaqstandyqtardyń ortaq tiline aınalýyn júzege asyrý baǵytynda naqty is-sharalardy qolǵa alatyn ýaqyt jetti. Osy baǵytta halqymyzdyń birligin nyǵaıtýda negizgi uıym retinde Assambleıa aldaǵy ýaqytta jappaı otandastarymyzdyń qazaq tilin meńgerýi, til ortaqtyǵy qaǵıdattaryn qalyptastyrý baǵytynda da ózindik rólin nyǵaıtýy qajet dep esepteımiz. Nátıjesinde, bir elde bárine ortaq tildiń qalyptasýy halyq birligin nyǵaıta túsetin ortaq múddeli, Ádiletti Qazaqstan ornaıtynyna esh kúmánimiz bolmaıdy. Sol sebepti bolashaqtaǵy QHA-nyń basym baǵytyn, barlyq kúsh-qýatyn osyǵan arnaý qajet.
Vladımır ShNAIDER,
Turan-Astana ýnıversıteti Assambleıa kafedrasynyń meńgerýshisi
