Eýrazııalyq ekonomıkalyq odaqqa ortaq energetıkalyq naryq 2019 jyly iske qosylady

ASTANA. 10 shilde. Eýrazııalyq ekonomıkalyq komıssııanyń energetıka jáne ınfraqurylym boıynsha alqa múshesi (mınıstr) Danıal Ahmetovtiń tóraǵalyǵymen munaı-gaz jónindegi konsýltatıvtik komıtettiń kezekten tys otyrysy ótti. Bul týraly «QazAqparat» habarlady. Otyrys barysynda Danıal Ahmetov: «Eýrazııalyq ekonomıkalyq komıssııa tarapynan ortaq elektr energetıkalyq naryq tujyrymdamasynyń jobasy 2015 jyldyń 1 shildesinde múshe-memleketterdiń Prezıdentteriniń qaraýyna jiberilýi kerek. 2016 jyly biz baǵdarlamany qabyldaımyz. Osylaısha Eýrazııalyq ekonomıkalyq odaqqa ortaq elektr energetıkalyq naryq 2019 jyly, al munaı men gazdyń ortaq naryǵy 2025 jyly qalyptasyp, jumys isteı bastaıdy. Biz bul baǵdarlamalardy qabyldaı kele, biryńǵaı energetıkalyq saıasatty qalyptastyramyz», – dedi. Sondaı-aq, ol 2025 jyly áriptes úsh memleket ortaq energetıkalyq naryqtyń qalyptasýyn qamtamasyz etetin halyqaralyq kelisimge qol qoıatynyn jetkizdi. Danıal Ahmetov jıyn barysynda ortaq naryq qalyptastyrýda álemdik tájirıbelerdiń ozyq úlgisi nazarǵa alynatynyn aıtty. D.Ahmetov: «Biz bul jerde álemdik tıimdi modelderdi qarastyrdyq. Ázirge baǵdarlama qalyptaspaǵan soń dál qandaı úlgi qabyldanatynyn aıta almaımyn. Alaıda, tarıh kýá bolǵandaı, Skandınavııa araly elderiniń qalyptastyrǵan úlgisi Nord Pool  birneshe memlekettiń energetıkalyq múmkindikterin shoǵyrlandyryp, elektr energııasyn únemdi jumsaýǵa ári el ekonomıkasynyń damýyna septigin tıgizdi. Sol sııaqty eýropalyq, amerıkalyq modelder bar. Meniń oıymsha, Eýrazııalyq ekonomıkalyq odaqqa ortaq naryq Eýropa modeli boıynsha qalyptasady. О́ıtkeni, munda ár eldiń ulttyq múddesi qatań qorǵalady», – dedi. Joldybaı Bazar. Derekkóz: «QazAqparat». Foto: forbes.kz.